اسلام آباد۔27جنوری(اے پی پی)گورنر سٹیٹ بینک جمیل احمد اعلان کیتے جو مانیٹری پالیسی کمیٹی شرح سود 13 فیصد توں ڳھٹا تے 12 فیصد کرݙتے۔ زری پالیسی کمیٹی اجلاس دے بعد نیوز کانفرنس کریندے انہاں آکھیا جو پاکستان دے معاشی اشاریے مثبت ہین، مہنگائی اتے کرنٹ اکائونٹ خسارہ خاطر خواہ ڳھٹیے، مہنگائی مئی 2023 اچ 38 فیصد ہئی جڑھی ڳھٹ تے 4.1 فیصد رہی، جنوری چ مہنگائی ٻئی ڳھٹسی، کرنٹ اکائونٹ کھاتہ مالی سال دی پہلی ششماہی اچ سرپلس ہووݨ پاروں زرمبادلہ ذخائر ودھین، جون تئیں مہنگائی دی شرح 5 توں 7 فیصد بینڈ دی اتلی سطح تے رہسی۔ گورنر سٹیٹ بینک آکھیا جو ورکرز ترسیلات اتے برآمدات دے نمبر چنڳے ہین، مجموعی زرمبادلہ ذخائر16.19 ارب ڈالر ہین، مالی سال 2025 اچ مہنگائی دی شرح 5.5 توں 7.5 فیصد رہسی، کرنٹ اکائونٹ کھاتہ 0.5 فیصد خسارے نال 0.5 فیصد سرپلس وچال رہسی، معاشی سرگرمیاں ودھدیاں پن، زرمبادلہ ذخائر مالی سال 2025 مکݨ تے 13 ارب ڈالر ہوسن، جی ڈی پی نمو 2.5 توں 3.5فیصد رہسی۔ زری پالیسی کمیٹی کے مطابق زرعی شعبے اچ سست روی اے، ٹیکسٹائل، خوراک و مشروبات اتے گاݙیاں ڄھیں اہم صنعتی شعبیاں بہتری ݙکھائی اے، کاروباری اعتماد دے اشاریے اچ مثبت رحجان اے، اقتصادی سرگرمیاں ٻیاں ودھݨ اتے حقیقی جی ڈی پی دی نمو سابقہ تخمینے 2.5 توں 3.5 فیصد تئیں رہݨ دی توقع اے۔ درآمدی اخراجات دی رفتار برآمدی آمدنی توں زیادہ رہی ٻھل ترسیلات زر دی آمد ودھدے تجارتی خسارے دا اثر زائل کر ݙتے۔ امکان اے جو جون 2025ء تئیں سٹیٹ بینک دے زرمبادلہ دے ذخائر 13 ارب ڈالر توں ودھ ویسن، ہدف دے مقابلے اچ ٹیکس وصولی اچ کمی دی شرح ودھی اے، توقع دے مطابق بجٹ اچ مختص رقوم دے مقابلے اچ انٹرسٹ دی کم ادائیگیاں نال امکان اے جو مجموعی مالیاتی خسارہ ہدف تئیں محدود رہسی۔ عمومی مہنگائی اچ کمی دا تسلسل برقرار رہے، جیڑھا نومبر اچ 4.9 فیصد توں گھٹ تے دسمبر اچ 4.1 فیصد سال بسال رہ گئی۔ مہنگائی اچ کمی دا رجحان بنیادی طور تے بجلی دے ملھ اچ کمی، اہم غذائی اشیاء دی مناسب رسد جیندے نال اشیائے خوردونوش دی مہنگائی اچ کمی تھیوݨ، شرح مبادلہ اچ استحکام اتے موافق اساسی اثر پاروں سامݨے آئے۔
