موسمیاتی تبدیلیاں ہک چیلنج، آئی ایم ایف نال آندے جائزہ اچ موسمیاتی موزونیت، لچک سہولت تے ڳالھ مہاڑ تھیسی، وزیر خزانہ محمد اورنگزیب دا او آئی سی سی آئی دی کانفرنس نال خطاب

اسلام آباد۔28جنوری(اے پی پی)وفاقی وزیر خزانہ و محصولات سینیٹر محمد اورنگزیب آکھیے جو موسمیاتی تبدیلیاں اتے ودھدی آبادی پاکستان کیتے وجودی خطرات ہین، حکومت ماحولیاتی تبدیلیاں نال نمٹݨ کیتے سنجیدہ کوششاں کریندی پئی اے، آئی ایم ایف نال آندے جائزہ اچ موسمیاتی موزونیت اتے لچک سہولت تے ڳالھ مہاڑ تھیسی۔ اے ڳالھ انہاں کراچی اچ اوورسیز انویسٹرز چیمبرآف کامرس اینڈ انڈسٹریز دے موسمیاتی تبدیلیاں بارے تریڄھی پاکستان کلائمیٹ کانفرنس نال خطاب اچ آکھی۔ انہاں آکھیا جو پاکستان موسمیاتی تبدیلیاں نال ودھ متاثر ملک اے، 2022 دا سیلاب پاکستان کیتے خطرے دی گھنٹی ہا جیندے بعد اقوام متحدہ دے سیکرٹری جنرل ایں سیلاب کوں ”موسمیاتی قتل وغارت“ قرار ݙتا ہا، حکومت موسمیاتی تبدیلیاں بارے ادارہ جاتی اقدامات کیتن اتے ہک قومی اڈاپٹیشن منصوبہ ٻݨائے، سالانہ ترقیاتی پروگرام اچ ماحولیات و موسمیات دے منصوبیاں کیتے فنڈز رکھیے ڳن، موسمیاتی تبدیلیاں بارے منصوبیاں کیتے مالی انتظام اتے انہاں تے عمل درآمد ضروری اے، جنیوا کانفرنس اچ پاکستان اچ موسمیاتی تبدیلیاں کیتے 9 ارب ڈالر دے وعدے کیتے ڳن ٻھل ایندے تے عمل درآمد نئیں تھیا، پاکستان فنڈ دے مسلے سانڳے گرین کلائمٹ فنڈ دے قیام سودھا ٻئے اقدامات کیتن، ایں سانڳے عالمی اداریاں اتے ملکاں کوں وی کردار ادا کرݨا ہوسی۔ انہاں آکھیا جو نجی شعبہ عملی منصوبیاں کیتے اہم کردار ادا کر سڳدے، پاکستان بین الاقوامی مالیاتی فنڈ نال 3 سالہ پروگرام کریندا پئے، فروری اچ آندے جائزہ کیتے آئی ایم ایف دی ٹیم پاکستان آسی تاں موسمیاتی موزونیت و لچک سہولت بارے ڳالھ تھیسی۔