پیکا ایکٹ سوشل میڈیا دے خطرات روکݨ کیتے اے، رولز ٻݨاوݨ کیتے مشاورت دی گنجائش موجود اے، وفاقی وزیر عطاءاللہ تارڑ

اسلام آباد۔31جنوری(اے پی پی)وفاقی وزیر اطلاعات، نشریات، قومی ورثہ و ثقافت عطاءاللہ تارڑ آکھیے جو سوشل میڈیا دے خطرات روکݨ کیتے پیکا ایکٹ چنڳاں اقدام اے جیندے نال میڈیا اتے اخبارات کوں کوئی مسلہ نا تھیسی، ایکٹ دے رولز ٻݨاوݨ کیتے مشاورت دی گنجائش موجود اے جیندے کتیے سارے اسٹیک ہولڈرز کوں نال ڳھن تے ٹرسوں۔ میڈیا نال الیندے انہاں آکھیا جو پارلیمنٹ دی منظوری دے بعد صدر مملکت پیکا ایکٹ ترمیمی بل تے دستخط کیتن اتے اے ہݨ قانون ٻݨ چکیے، ملک اچ سوشل میڈیا نال فیک پروپیگنڈا، جعلی خبریں، ہراسیت، ٻالاں نال بدسلوکی ڄھیاں نامناسب خبراں کھنݙاوݨ اتے ملکی سالمیت کوں نقصان پچاوݨ دیاں کوششاں کوں ݙیہدے ہوئے پیکا ایکٹ ترمیمی بل دی منظوری مناسب سمجھی ڳئی اے تاں جو سوشل میڈیا نال تھیوݨ آلے نقصانات روکیے ونڄن، سوشل میڈیا تے ملک اچ افراتفری کھنݙائی ویندی اے، معیشت بارے غیر یقینی صورتحال ݙکھاوݨ دی کوشش کیتی ویندی اے، کوڑے فتوے اتے توہین معمول اے، تریمتیں کوں بلیک میل کرݨ نال نفسیاتی مسائل آندن، سوشل میڈیا پروٹیکشن اتھارٹی اچ نجی شعبے توں نامزدگیاں کیتاں ویسن جیندے اچ پریس کلب یا صحافتی تنظیماں نال جڑیے صحافیاں کوں شامل کیتا ویسی، ٹربیونل اچ وی صحافیاں اتے آئی ٹی پروفیشنل کوں رکھیا ڳئے۔ عطاءاللہ تارڑ آکھیا جو پیکا ٹربیونل دے فیصلے دے خلاف اپیل بارے ابہام ہن ٻھل ہݨ ٻہوں کلیرٹی اے، ہݨ پیکا ٹربیونل دے فیصلے وی چیلنج کیتے ونڄ سڳسن، ٹربیونل 24 گھنٹے اچ زبانی آرڈر پاس کریسن جیکوں رٹ پٹیشن نال ہائی کورٹ اچ چیلنج کیتا ونڄ سڳسی اتے سپریم کورٹ اچ وی اپیل کیتی ونڄ سڳدی اے۔ سوشل میڈیا خطرات اتے بدامنی روکݨ کیتے ایکٹ بہتر ثابت تھیسی، ساریاں صحافتی تنظیماں کوں ایندی حمایت کرݨی چاہیدی اے، ساکوں رولز اتے مشاورت نال اڳو تے ودھݨا چاہیدے، پیکا ایکٹ اچ کوئی ہک متنازعہ شق اے تاں سامݨے ڳھن آئو،ا ساں الاوݨ کوں تیار ہیں۔ انہاں آکھیا جو احتجاج ہر ہک دا حق اے، ڄڳ اچ سوشل میڈیا لاء اتے چیک اینڈ بیلنس موجود اے، مغربی ممالک اتے دنیا دے مہذب معاشرے اچ سوشل میڈیا قوانین موجود ہین، ایں بارے احتجاج دی ڳالھ تھیندی اے ٻھل شقاں تے کوئی نئیں الیندا، ٹریبونل اتے سوشل میڈیا پروٹیکشن اتھارٹی اچ نجی شعبے دے لوگ اتے پریس کلب دے صحافی شامل ہین ایندے نال نال کونسل آف کمپلینٹس اچ وی اپیل اتے رٹ پٹیشن دا حق ݙتا ڳئے تاں ول کیہڑی شے دا ݙر اے؟ ایندے اچ کوئی قابل اعتراض ڳالھ کائنی، ساݙی جنریشن دا سب توں وݙا خطرہ سوشل میڈیا تے کھنݙݨ آلی ڈس انفارمیشن اے، عالمی ادارے ایندے تے الیندے پن، ڄڳ دے مہذب ممالک ایندے تے ون پیج تے ہین اتے ایں سانڳے اپݨی قانون سازی کریندے پئے ہیں تاں ول پاکستان اچ ایکوں کیوں برا سمجھیا ویندا پئے۔