آذربائیجان تے پاکستان وچال سانجھے تعاون دے 15معاہدیں تے کم تھیندا پئے ، سرمایہ کاری سانڳے 2ارب ڈالر دے معاہدے ، موٹرویز سودھے مختلف شعبیں اچ وݙے پیمانے تے انویسٹمنٹ متوقع اے، عبدالعلیم خان

اسلام آباد/باکو۔1فروری (اے پی پی) وفاقی وزیر سرمایہ کاری ، نجکاری و مواصلات عبدالعلیم خان آکھیے وزیراعظم محمد شہباز شریف اڄوکے مہینے دے ادھ اچ ایشیائی ملکاں دا دورہ کریسن ، آذربائیجان توں سرمایہ کاری سانڳے 2ارب ڈالر دے معاہدے تے موٹرویز سودھے مختلف شعبیں اچ وݙے پیمانے تے سرمایہ کاری متوقع اے۔ اتھاں ملݨ آلے اعلامیہ موجب وفاقی وزیر سرمایہ کاری ، نجکاری و مواصلات عبدالعلیم خان دی سربراہی اچ پاکستانی وفد آذربائیجان دے وزرا نال ملاقاتاں کیتن جنہاں اچ ذربائیجان دے ٹرانسپورٹ، سرمایہ کاری،انرجی تے اقتصادی امور دے وزرا شامل ہن ۔ وفاقی وزیر عبدالعلیم خان باکو اچ مشاورتی اجلاس اچ وی شرکت کیتی ایں موقع تے ڳالھ مہاڑ کریندے انہاں آکھیے آذربائیجان تے پاکستان وچال سانجھے تعاون دے 15معاہدیں تے کم تھیندا پئے ،وزیراعظم اڄوکے مہینے دے ادھ اچ ایشیائی ملکاں دا دورہ کریسن ، آذربائیجان توں سرمایہ کاری سانڳے 2ارب ڈالر دے معاہدے کیتے ویسن موٹرویز سودھے مختلف شعبیں اچ وݙے پیمانے تے انویسٹمنٹ متوقع اے۔ عبدالعلیم خان نال آذربائیجان دے وزیر توانائی پرویز شہبازوف تے باکو اچ ڈپٹی منسٹر اقتصادی امور صمد بشیری وی ملاقات کیتی تے سانجھی دلچسپی دے امور تے ڳالھ مہاڑ کیتی ۔وزراء آذربائیجان پاکستانی وفد دا والہانہ خیر مقدم کریندے آکھیے ݙوہیں ملک مستقبل اچ سانجھے اشتراک نال اڳوں ودھ سڳدن ۔ آذربائیجان دے وزیر ٹرانسپورٹ راشد نبی اوف وی پاکستانی وفد نال ملاقات کیتی تے آئل اینڈ گیس دے شعبے اچ ݙوہیں ملکاں تفصیلی مذاکرات کیتن تے اہم امور تے ڳالھ مہاڑ تھئی ۔ وفاقی وزیر نجکاری ، سرمایہ کاری بورڈ و مواصلات آذربائیجان دے مختلف وفد نال ملاقاتاں دے دوران بریفنگ ݙیندے آکھیے پاکستان دے نجکاری دے منصوبیں اچ آذربائیجان دے سرمایہ کار گھاٹی دلچسپی دا مظاہرہ کریندے پئن پاکستان توں وفاقی سیکرٹری اتے ایس آئی ایف سی دے حکام وی اجلاس اچ شریک ہن۔ وزیراعظم آذربائیجان علی اسدوف نال وی وفاقی وزیر عبدالعلیم خان دی اڄ ملاقات متوقع اے