ہر صورت پاکستان توں پولیو مکاوݨ کیتے سخت اقدامات کرݨے ہوسن، وزیر اعظم شہباز شریف

لاہور۔2فروری(اے پی پی)وزیر اعظم محمد شہباز شریف آکھیے جو ساکوں ہر صورت پاکستان توں پولیو کوں منݙھو مکاوݨے، مربوط حکمت عملی اتےر مشترکہ کوششاں نال پولیو کوں مکایا ونڄ سڳدے، انسداد پولیو مہم نال ٻالاں دا مستقبل محفوظ ٻݨایا ویندا پئے۔ اے ڳالھ انہاں اسلام آباد اچ اڄوکے سال 2025 دی پہلی قومی انسداد پولیو مہم دی افتتاحی تقریب نال خطاب اچ کیتی۔ انہاں آکھیا جو انسداد پولیو تعاون تے عالمی ادارہ صحت، یونیسف، سعودی عرب سودھا ٻئے عالمی شراکت داروں دی معاونت تے مشکور ہیں، اللہ تعالی دے فضل نال 2025 دی پولیو مہم شروع تھیندی پئی اے، پاکستان دے کروڑاں ٻالاں کوں پولیو دے قطرے پلا تے ایں مرض توں قوم دے ٻالاں کوں محفوظ ٻݨیسوں۔

وزیر اعظم آکھیا جو انسداد پولیو ٹیم دی محنت قابل تعریف اے، ایں مہم اچ پولیو ورکرز ملک دے دور دراز علاقیاں اتے دیہاتاں اچ ہر ڄاہ تے پڄ تے ہک اہم قومی فریضہ انجام ݙیسن، پچھلے سال ملک اچ پولیو دے تقریبا 77 کیسز سامݨے آئن جیڑھے ہک وݙا چیلنج اتے پولیو بارے وݙا سیت بیک ہا، ایں سال جنوری اچ وی ہک کیس ریکارڈ تھئے، اے کیس نا ہووݨا چاہیدا ٻھل ہر صورت اساں پولیو کوں پاکستان توں مکاوݨے۔ وزیر اعظم شہباز شریف آکھیے جو ایں سانڳے ہمسایہ ملک افغانستان نال رابطے اچ ہیں، امید اے باہمی تعاون نال افغانستان توں وی پولیو مکسی۔ انہاں انسداد پولیو کیتے معاونت تے عالمی ادارہ صحت، یونیسف، سعودی عرب، بل گیٹس فاؤنڈیشن سودھا ٻئے شراکت داراں دا شکریہ ادا کریندے آکھیے جو مشترکہ کوششاں نال ہی پولیو مکا سڳدے ہیں، مربوط حکمت عملی اتے مشترکہ کوششاں نال اساں پاکستان توں پولیو مکا سڳسوں، پولیو مکاوݨ کیتے اقدامات جاری رکھسوں