وزیراعظم محمد شہباز شریف نال سعودی وفد دی فنڈ دے چیف ایگزیکٹو آفیسر سلطان بن عبدالرحمٰن المرشد دی قیادت اچ ملاقات

اسلام آباد۔3فروری (اے پی پی) پاکستان تے سعودی فنڈ ترقی وچال ھک سال سانڳے 1.20 ارب ڈالر دے تیل دی مؤخر ادائیگی دا معاہدہ طے پا ڳئے جیڑھا جو پٹرولیم مصنوعات دی مستحکم فراہمی یقینی بݨا تے پاکستان دی معیشت کوں تکڑا بݨاوݨ اچ مددگار ثابت تھیسی جݙاں جو مانسہرہ اچ واٹر سپلائی سکیم سانڳے41 ملین ڈالر دی فراہمی دے معاہدے تے وی دستخط کیتے ڳئن ۔ وزیراعظم محمد شہباز شریف آئل امپورٹ فنانسنگ دی سہولت اتے مانسہرہ، خیبر پختونخوا اچ گریویٹی فلو واٹر سپلائی سکیم معاہدیں تے دستخطاں دی تقریب اچ شرکت کیتی ۔ سیکرٹری اقتصادی امور ڈویژن ڈاکٹر کاظم نیاز تے سی ای او ایس ایف ڈی سلطان بن عبدالرحمان المرشد اپݨی اپݨی حکومتاں دی طرفوں معاہدیں تے دستخط کیتن۔ وزیراعظم دفتر میڈیا ونگ توں جاری بیان موجب وزیر اعظم محمد شہباز شریف نال سعودی فنڈ ترقی دے وفد فنڈ دے چیف ایگزیکٹو افسر سلطان بن عبدالرحمٰن المرشد دی قیادت اچ ملاقات کیتی۔ وزیراعظم سعودی عرب اتے پاکستان وچال پراݨی یاری دا حوالہ ݙیندے صحت، توانائی، انفراسٹرکچر تے تعلیم دے شعبیں اچ پاکستان کوں مالی امداد ݙیوݨ دے نال نال 2022ء دی تباہ کن چھل دے بعد نویں سروں تعمیر سانڳے سعودی فنڈ برائے ترقی دیاں کوششاں دی تعریف کیتی ۔سعودی فنڈ دے چیف ایگزیکٹو افسر سعودی وفد دے پرتپاک استقبال اتے مہمان نوازی تے وزیراعظم اتے حکومت پاکستان دا شکریہ ادا کیتے۔انہاں وزیراعظم کوں جاری منصوبیں بشمول مہمند ہائیڈرو پاور پراجیکٹ، گولن گول ہائیڈرو پاور پراجیکٹ، مالاکنڈ ریجنل ڈویلپمنٹ پراجیکٹ اتے سعودی گرانٹس دے ذریعے فنڈ کیتے ڳئے ٻئے منصوبیں بارے پیشرفت دا ݙسائے ۔وزیراعظم سعودی فنڈ برائے ترقی دی امداد دی تعریف کریندے گرین انرجی تے بنیادی ڈھانچے دے شعبے اچ فنڈ نال اشتراک دے نویں منصوبیں تے کم دی رفتار کوں تکھا کرݨ دی لوڑھ تے زور ݙتا جنہاں دے ذریعے پاکستان دی پائیدار ترقی یقینی بݨاوݨ اچ مدد ملسی ۔ ایس ایف ڈی دے چیف ایگزیکٹو افسر مشترکہ منصوبیں تے وختی کاروائی دا یقین ݙیوائے تے ایں ڳالھ دا اعادہ وی کیتے جو سعودی عرب شاہی خاندان دی قیادت اچ پاکستان کوں ہر ممکن مدد اتے مسلسل تعاون ݙیسی۔ وزیراعظم سی ای او اتے وفد دے ارکان دا شکریہ ادا کیتا اتے شاہی خاندان دے سارے ارکان بالخصوص خادم الحرمین الشریفین شاہ سلمان بن عبدالعزیز السعود اتے ولی عہد تے وزیر اعظم محمد بن سلمان سانڳے نیک خواہشات دا اظہار کیتے۔نائب وزیراعظم اسحاق ڈار، وفاقی وزیر اقتصادی امور ڈویژن احد خان چیمہ، وفاقی وزیر خزانہ محمد اورنگزیب، وفاقی وزیر اطلاعات و نشریات عطاء اللہ تارڑ، وفاقی وزیر پٹرولیم ڈاکٹر مصدق ملک اتے معاون خصوصی وزیراعظم طارق فاطمی،پاکستان اچ سعودی سفیر نواف بن سعید المالکی اتے سعودی وفد دے ارکان وی ایں موقع تے موجود ہن۔ ایں توں انڄ وزیراعظم آئل امپورٹ فنانسنگ فیسلٹی تے دستخط دا خیرمقدم کیتے جیں موجب پاکستان کوں ھک سال سانڳے 1.20 ارب ڈالر دا تیل مؤخر ادائیگی تے ملسی۔ اے منصوبہ وختی مالیاتی ٻوجھ کوں گھٹ کریندے پٹرولیم مصنوعات دی مستحکم فراہمی یقینی بݨا تے پاکستان دی معیشت کوں تکڑا بݨاوݨ اچ مددگار ثابت تھیسی ۔ سعودی فنڈ ترقی مانسہرہ خیبر پختونخواہ اچ گریوٹی فلو واٹر سپلائی سکیم سانڳے 41 ملین ڈالر رعایتی قرضہ ݙیسی ایں توں مانسہرہ دے 150,000 مقامی لوکاں کوں پیوݨ دے صاف پاݨی تئیں رسائی ملسی تے 2040ء تئیں 201,249 لوکاں دی پاݨی دی طلب کوں پورا کیتا ونڄ سڳسی۔