پوری قوم ٻدھ کوں کشمیری عوام نال یکجہتی دا بھر پور مظاہرہ کریسی، حکومت دے معاشی اقدامات پاروں مہانگ 9 سال دی گھٹ سطح تے آڳئی اے، وزیراعظم شہبازشریف

اسلام آباد۔4فروری(اے پی پی) وزیراعظم محمد شہبازشریف آکھیے پوری قوم اڄ ٻدھ کوں کشمیری عوام نال یکجہتی دا بھرپور مظاہرہ کریسی ،آزادی دی تحریک اچ کشمیری بھراویں دے نال ہیسے ، حکومت دے معاشی اقدامات پاروں مہانگ 9 سال دی گھٹ سطح تے آڳئی اے، ساریاں توانائیاں معاشی شرح نمو سانڳے صرف کریسوں، سعودی عرب ولوں تیل دی موخر ادائیگی دی سہولت سانڳے انہاں دے شکرگزار ہیسے ،چارے صوبیں اچ زرعی ٹیکس دے نفاذ دی منظوری توں آئی ایم ایف دا مطالبہ پورا تھی ڳئے ، زرعی ٹیکس ویلھے دی لوڑھ اے ، یوٹیلیٹی سٹورز دے بغیر رمضان پیکج گھن آیا ویسی ۔ وزیر اعظم محمد شہباز شریف اے ڳالھ وفاقی کابینہ دے اجلاس اچ آکھی ۔ وزیراعظم آکھیے یوم یکجہتی کشمیرقومی جذبے نال منایا ویسی ، آزادی دی تحریک اچ اساں کشمیری بھراویں دے نال ہیسے تے خیبر توں کراچی تئیں پاکستان دے عوام کشمیریاں نال یکجہتی دا اظہار کریندوں۔ وزیراعظم نویں سال دے آغاز تے مہانگ دی شرح مزید گھٹ تھیوݨ تے وفاقی کابینہ دے ارکان بالخصوص فنانس ٹیم کوں مبارخ ݙتی ۔ انہاں آکھیے جنوری 2025 اچ مہانگ دی شرح مزید گھٹ تھی تے 2.4 فیصد تے آچکی اے، مہانگ 9 سال دی گھٹ ترین سطح تے ہووݨ دا خیرمقدم کریندوں ۔ سال 2024 دے آغاز اچ مہانگ دی شرح 28.73 فیصد ہئی، دسمبر 2024 اچ مہانگ 4.1 فیصد تئیں گھٹ تھئی،مہانگ دی شرح دا بتدریج گھٹ تھیوݨ ٻہوں چنڳی ڳالھ اے ۔ وزیراعظم آکھیے کھاوݨ پیوݨ دیاں چیزاں نرخاں اچ کمی توں عام آدمی کوں ریلیف ملدا پئے ، پاکستان معاشی استحکام دے بعد ہݨ معاشی ترقی دے رستے تے ٹردا پئے ۔ وزیراعظم آکھیے سعودی عرب جیڑھا پاکستان دا بھرا ملک اے تے پاکستان سانڳے نیک خواہشات رکھیندے۔سعودی وفد گزریل ݙینھ پاکستان دا دورہ کیتا، سعودی عرب تیل دی درآمد تے ھک سال سانڳے 1.2 ارب ڈالر موخر ادائیگی دی سہولت دا دورانیہ ودھا ݙتے۔موخر ادائیگی دی سہولت سانڳے سعودی عرب دے شکر گزار ہیسے، ایں توں ساݙے زرمبادلہ دے ذخیرے کوں طاقت لسی تے سرمایہ کاری اچ ودھارا تھیسی ۔ وزیراعظم پاکستان تے سعودی فنڈ فارڈویلپمنٹ وچال مختلف شعبیں اچ سمجھوتیں کوں چنڳاں قرار ݙیندے آکھیے سعودی فنڈ نال مانسہرہ اچ واٹر سپلائی سکیم سانڳے4 کروڑ 10 لکھ ڈالر دے منصوبے تے دستخط تھئن ایں توں انڄ 4 کروڑ ڈالر دی لاڳت توں کنگ سلمان ہسپتال وی تعمیر کیتا ویسی وزیراعظم زرعی ٹیکس دے نفاذ دی منظوری تے چارے صوبیں دا شکریہ ادا کریندے آکھیے سندھ تےبلوچستان وی زرعی ٹیکس دے نفاذ دی منظوری ݙے ݙتی اے ایویں آئی ایم ایف دا زرعی ٹیکس دا مطالبہ پورا تھی ڳئے ۔ زرعی ٹیکس ویلھے دا تقاضا اے ، پنجاب ساریں توں پہلے کم کیتے۔ وزیراعظم چارے وزرائے اعلیٰ دا شکریہ اداکیتے جنہاں وفاق پاکستان نال رل تے پاکستان دی وݙی ذمہ داری دی ادائیگی سانڳے فیصلے کیتن انہاں صدر آصف علی زرداری ، سابق وزیراعظم میاں محمد نواز شریف تے بلاول بھٹو زرداری دا وی شکریہ ادا کیتے۔ وزیراعظم وزارت قومی غذائی تحفظ و تحقیق کوں ہدایت کیتی جو یوٹیلیٹی سٹورز دے بغیررمضان پیکج تیار کیتا ونڄے تاں جو کرپشن تے خراب مال دیاں شکایتان ول سامݨے نہ آون ۔ وزیراعظم آکھیے کئی مہینے پہلے میں ہدایت کیتی ہئی جو اے معاملہ پہلے وانڳوں نی چل سڳدا ۔ گزریل رمضان اچ بے پناہ شکایتاں ہن ایں سانڳے ہݨ مائنس یوٹیلیٹی سٹور سکیم گھن آئی ویسی ۔ وزیراعظم آکھیے انسداد پولیو مہم ول شروع تھی چکی اے ، صوبیں نال رل تے بھرپور طریقے نال پولیو انسداد سانڳے مہم چلائی ویندی پئی اے ۔ وزیراعظم جمرود اچ انسدادپولیو ٹیم تے حملے دے واقعہ تے افسوس کیتے جیں اچ ھک پولیس اہلکارا شہید تھئے ۔ وزیراعظم کابینہ کوں ݙسائے جو او گزریل ݙینھ کوئٹہ دے دورے تے ہن ۔ قلات اچ ھک کارروائی دے دوران 23 خوارج کوں جہنم رسید کیتا ڳئے، خوارج نال لڑدے 18 جوان شہید تھئن ۔ وزیراعظم ݙسائے انہاں زخمی سکیورٹی اہلکاراں دی عیادت کیتی، انہاں دے حوصلے اُچے ہن ۔ وزیراعظم آکھیے نینگراں دے ملک دی خاطر قربانی دے جذبے تے غیرمتزلزل عزم دی پوری قوم معترف اے ، ملک و قوم سانڳے قربانیاں ݙیوݨ آلے قوم دے ہیرو ہن، افواج پاکستان تے عوام دہشت گردی دے ناسور دے منڈھوں مکاوݨ سانڳے شانہ بشانہ ہن۔ وزیراعظم آکھیے ماضی اچ دہشت گرداں کوں چھوڑݨ دی فاش غلطی اتے فیصلے دا نتیجہ بھوڳݨا پوندا پئے ، افواج پاکستان ، ایف سی، رینجرز تے پولیس دے جوان جیڑھیاں قربانیاں ݙیندےپئن او تاریخ اچ سنہرے حروف اچ لکھیاں ویسن۔