وزیراعظم 72 ݙینھاں دی ریکارڈ مدت اچ مکمل کیتے ڳئے جناح سکوائرانڈر پاسز منصوبے دا افتتاح کرݙتا، اسلام آباد کوں سوہݨے لحاظ نال پاکستان سانڳے ھک مثال بݨایا ویسی ، محمد شہباز شریف

اسلام آباد۔4فروری(اے پی پی) وزیراعظم محمد شہباز شریف 72 ݙینھاں دی ریکارڈ مدت اچ مکمل کیتے ڳئے جناح سکوائر انڈر پاسز منصوبے دا افتتاح کرݙتے جیں توں شہریاں کوں ویلھے تے ایندھن دی بچت دے نال ماحولیاتی آلودگی تے قابو پاوݨ اچ مدد وی ملسی جݙاں جو خیابان سہروردی ، سری نگر ہائی وے اتے کلب روڈ جنکشن تے ٹریفک دا دٻاؤ گھٹ تھیسی ۔ منصوبے دی افتتاحی تقریب توں خطاب کریندے وزیراعظم آکھیے اسلام آباد کوں خوبصورتی دے لحاظ نال پاکستان سانڳے ھک مثال بݨایا ویسی ۔اسلام آباد اچ ٹریفک دے دٻاؤ کوں گھٹ کرݨ سانڳے جناح سکوائر دا ٻہوں وݙا منصوبہ اڄ توڑ پڄے ۔ ایں اچ ترائے انڈر پاسز ہن جنہاں دی سڑکوں دی لمبائی 14 کلومیٹر اے، ایں منصوبے توں نہ صرف عوام دا ویلھا تے ایندھن بچسی بلکہ ٹریفک جام پاروں جیڑھا ماحولیاتی آلودگی تھیندی ہئی او وی گھٹ تھیسی ۔ وزیراعظم برق رفتاری نال 72 ݙینھاں دی ریکارڈ مدت اچ اے منصوبہ مکمل کرݨ تے وزیر داخلہ دیاں کوششاں دی تعریف کریندے آکھیے انہاں پنجاب سپیڈ کوں محسن سپیڈ اچ بدل ݙتے ۔ انہاں وزیر داخلہ تے چیئرمین سی ڈی اے کوں ہدایت کیتی جو باقی منصوبیں کوں وی ایں رفتار نال توڑ پڄاؤ ۔ وزیراعظم 60ء دے ݙھاکے اچ تعمیر کیتی ونڄݨ آلی سرکاری عمارتاں تے وزارتاں دے دفتراں دی تزئین و آرائش دی لوڑھ تے زور ݙیندے آکھیے اسلام آباد کوں سوہݨپ دے لحاظ نال پاکستان سانڳے مثال بݨایا ونڄے تاں جو ٻاہروں آوݨ آلے مہمان ایں خوبصورتی توں متاثر تھئے بغیر نہ رہ سڳن۔ وزیراعظم آکھیے شنگھائی تعاون تنظیم دی کانفرنس دے موقع تے شہر کوں جیں سوہݨے طریقے نال سجایا ڳیا ہئی غیر ملکی مہماناں ایں دی ٻہوں تعریف کیتی ۔ وزیراعظم ہدایت کیتی جو اسلام آباد دے سارے منصوبیں کوں توڑ پڄایا ونڄے ، شہر دی خوبصورتی اچ ودھارا کیتا ونڄے ، جناح سکوائر دےا نڈر پاسز دی دیواراں تے خوبصورت نقش و نگار بݨائے ونڄن تے لاہور دے انڈر پاسز وانڳوں لینڈ سکیپنگ کیتی ونڄے ۔ وزیراعظم آکھیے قوماں دی زندگی کوں بدلݨ تے ترقی سانڳے ایں طرح دے اقدامات ناگزیر ہن ۔ ایندے توں پہلے وزیراعظم محمد شہباز شریف تختی دی نقاب کشائی کرتے منصوبے دا افتتاح کیتا۔ وزیر داخلہ محسن نقوی تقریب توں خطاب کریندے آکھیے سی ڈی اے ایں منصوبے تے ٻہوں محنت کیتی تے ݙینھ رات انہاں دیاں ٹیماں موجود رہیاں ۔ اتنی گھٹ مدت اچ منصوبے دا مکمل تھیوݨ ھک ناممکن جیہا کم لڳدا ہئی ۔ انہاں اعلان کیتے جو اسلام آباد اچ ٻہوں وختی مزید منصوبے شروع کیتے ویسن ، ایف نائن دا فلائی اوور وی وختی کھولیا ویسی ۔ ایندے توں پہلے چیئرمین سی ڈی اے وزیراعظم کوں بریفنگ ݙیندے ݙسائے اے ٻہوں وݙا منصوبہ ہئی جیں کوں 72 ݙینھ دی ریکارڈ مدت مکمل کیتا ڳئے ۔ واضح رہے ایں منصوبے تے کم دا باقاعدہ آغاز19 نومبر 2024 کوں تھیاہئی منصوبے دی تکمیل دا عرصہ 120 ݙینھ ہئی تاں جو اے ٻہوں تکھی رفتار نال 72 ݙینھ دی ریکارڈ مدت اچ30 جنوری 2025 کوں ویلھے توں پہلے مکمل کرڳھدا ڳئے۔ تقریب اچ وفاقی وزیر داخلہ محسن نقوی، وفاقی وزیر اطلاعات و نشریات عطاء اللہ تارڑ، ارکان اسمبلی، چیئرمین سی ڈی اے، چیف کمشنر سودھے اعلیٰ حکام وی موجود ہن