چیئرمین سینیٹ یوسف رضا گیلانی نال جاپان دے سفیر اکامٹسو سوئچی دی ملاقات

اسلام آباد۔4فروری(اے پی پی) چیئرمین سینیٹ سید یوسف رضا گیلانی نال جاپان دے سفیر اکامٹسو سوئچی ملاقات کیتی تے ݙو پاسے تعلقات، اقتصادی تعاون اتے عوامی رابطے دے وداھرے تے ڳالھ مہاڑ کیتی ۔سینیٹ سیکرٹریٹ توں جاری بیان موجب ایں موقع تے چیئرمین سینیٹ آکھیے پاکستان جاپان نال ݙوپاسے تعاون تے رابطے کوں قدر دی نگاہ نال ݙیکھدے ۔ پاکستان اتء جاپان وچال تعلقات تاریخی حیثیت دے حامل ہن تے ݙوہیں ملکاں اوکھے ویلھے ھک ݙوجھے دا ساتھ ݙتے ۔سید یوسف رضا گیلانی آکھیے جاپان پاکستان اچ چھل تے قدرتی آفتاں دے دوران مدد کیتی تے بحالی دے کماں اچ بھرپور تعاون کیتے جیں تے اساں جاپانی حکومت تے عوام دے شکر گزار ہیسے۔ انہاں مزید آکھیےپاکستان، جاپان نال ݙو پاسے تعاون مزید مستحکم کرݨ چاہندے ، خاص طور تے تعلیم تے فلاحی شعبیں اچ جاپان دی مسلسل حمایت قابل تعریف اے۔انہاں آکھیے پاکستان جاپان دے سفارتی تعلقات 1952ء  اچ بݨیے ۔بحیثیت وزیراعظم جاپان دی قیادت نال وقتاً فوقتاً ملاقاتاں وی تھیاں ۔چیئرمین سینیٹ آکھیے ݙوہیں ملکاں وچال تجارتی تعلقات کوں مزید ودھارا ݙیوݨ دی لوڑھ اے تے عوامی سطح تے رابطے ودھاوݨ نال ݙو پاسے تعلقات کوں مزید وسعت ملسی ۔ 2018ء اچ پاکستان جاپان فرینڈشپ فورم دا قیام عمل اچ آئے جیڑھا عوامی سطح تے تعلقات ودھاوݨ اچ معاون ثابت تھئے ۔انہاں آکھیے پارلیمانی وفد دے تبادلے ودھاوݨ دی لوڑھ اے کیوں جو اعلیٰ سطحی وفد دے تبادلیں توں عوامی رابطہ کاری کوں طاقت ملسی ۔ پارلیمانی سفارت کاری دے ذریعے ݙوطرفہ تعلقات کوں ادارہ جاتی شکل ݙتی ونڄ سڳدی اے تے ایں سلسلے اچ پارلیمانی فرینڈشپ گروپ وی بݨایا ڳئے ۔چیئرمین سینیٹ آکھیے پاکستان جاپان دے تجربیں تعلیم، ٹیکنالوجی، زراعت اتے ٻئے شعبیں توں فیدہ چاسڳدے ۔ ݙوہیں ملکاں وچال بین الاقوامی فورمز تے بہترین تعاون ھک ݙوجھے تے اعتماد دا مظہر اے۔علاقائی سلامتی تے پاکستان تے جاپان ایں معاملے تے سانجھا عزم رکھیندن۔ سید یوسف رضا گیلانی آکھیے جاپان پاکستانی نینگراں دی فنی تربیت سانڳے مزید پروگرام ترتیب ݙیوے تاںجو جاپان اچ درکار افرادی قوت دی لوڑھ کوں پورا کیتا ونڄ سڳے ۔ سید یوسف رضا گیلانی جاپان دے سفیر کوں ملتان دورے دی دعوت ݙتی تے آکھیے ملتان دی کئی مصنوعات قومی و بین الاقوامی سطح تے مقبول ہن۔ ملتان چیمبر آف کامرس اینڈ انڈسٹری نال رل تے تجارتی شعبے اچ جاپان سانڳے وسیع موقع موجود ہن