وزارت مذہبی اموردا حج 2024 دے سرکاری سکیم دے حاجیاں کوں 4 ارب 75 کروڑ روپے واپس کرݨ دا اعلان ، 40 ݙینھ دا حج 10 لکھ 50 ہزارتے 25  ݙینھ دا حج 11 لکھ روپے دا ہوسی۔ وفاقی وزیر مذہبی امور چوہدری سالک حسین دی پریس کانفرنس

اسلام آباد۔4فروری(اے پی پی) وزارت مذہبی امور حج 2024 دے سرکاری سکیم دے حاجیاں کوں 4 ارب 75 کروڑ روپے واپس کرݨ دا اعلان کیتے جیں دے تحت حاجیاں کوں 20 ہزار روپے توں ھک لکھ 40 ہزار تئیں دی رقم واپس کرݨ سانڳے ست کیٹگریز بݨائیاں ڳئن۔ اڄوکے سال حج 2025 دے عازمین دے حج خرچے وی گھٹ کرݨ دا اعلان کیتا ڳئے ، 40 ݙینھاں دا حج 10 لکھ 50 ہزار تے 25 ݙینھ دا حج 11 لکھ روپے دا ہوسی۔ ایں ڳالھ دا اعلان وفاقی وزیر مذہبی امور چوہدری سالک حسین پریس کانفرنس توں خطاب کریندے آکھیے ۔ ، انہاں آکھیے وزیراعظم محمد شہباز شریف دی ہدایات دے تحت ساݙی ٹیم دی ودھ ساری محنت لڳن پاروں کجھ چنڳیاں خبراں ہن ، ﷲ دے مہماناں دے سفر کوں سوکھا تے سہولتاں توں بھرپور بݨاوݨ اچ سعودی حکومت بالخصوص وزیر حج و عمرہ ڈاکٹر توفیق بن ربیعہ، ڈپٹی وزیر حسن مناخرہ اتے بھراویں جیھے سعودی سفیر نواف سعید المالکی دے بھرپور تعاون دا شکرگزار ہاں، حج انتظامات کوں حتمی شکل ݙیوݨ سانڳے میری ٹیم دے سارے افسران پاکستان تے سعودی عرب اچ سارے سٹیک ہولڈرز نال مسلسل رابطے اچ رہیے ، حج انتظامات کوں سعودی تعلیمات تے گزریل تجربے دی روشنی اچ حج 2024ء دے وختی بعد شروع کیتا ڳیا وختی اقدامات پارں فضائی کمپنیاں نال گزریل سال دے مقابلے اچ گھٹ خرچے تے معاہدے تھئن ایں توں انڄ سعودی عرب اچ منیٰ، مکاتب، مکہ تے مدینہ منورہ دی رہائش گاہواں، خوراک و ٹرانسپورٹ دے خرچے کوں مناسب حد تئیں رکھݨ تے سہولتاں مزید بہتر کرݨ اچ کامیاب رہیے ۔ انہاں آکھیے فضائی کمپنیاں نال ڳالھ مہاڑ کتے ٻئے حج خرچے گھٹا تے اساں حاجیاں کوں رقم واپس کرݨ دا فیصلہ کیتے کیوں جو اے حاجیاں دی رقم اے اتے مکمل حساب کرتے  اساں رقم دی واپسی دا فارمولا بݨائے ، کہیں حاجی کوں ھک لکھ روپے واپس ملدن تے کہیں کوں 20 ہزار ملدن ، ایں دا تعین حاجیاں کوں حجاز مقدس اچ ملݨ آلیاں سہولتاں موجب ہوسی ۔ ایڈیشنل سیکرٹری ڈاکٹر عطاء الرحمن آکھیے ھک لکھ لاکھ 40 ہزار واپس ملݨ آلی ساریں توں وݙی رقم اے، اے  رقم 20 ہزار 228 لوکاں کوں ملسی ھک لکھ 10 ہزار دی رقم 10 فیصد حجاج یعنی 6 ہزار 784 لوکاں کوں واپس ملسی 90 ہزار دی رقم 26 فیصد اتے 75 ہزار دی رقم 23 فیصد لوکاں کوں ملسی ، ایویں 50 ہزار روپے 19 فیصد کوں واپس ملسن 35 ہزار 358 تے 20 ہزار جیڑھی ساریں توں گھٹ رقم اے او14 فیصد حجاج کوں ملسی ۔ ڈاکٹر عطاء الرحمن آکھیے جنہاں کوں گھٹ رقم ملدی پئی اے انہاں کوں مدینہ تے مکہ اچ حرم دے نیڑے ساریں توں چنڳی رہائش ملسی ۔ وزیر مذہبی امور چوہدری سالک حسین آکھیے رقم دے ریفنڈ دا اساں پورا فارمولا بݨائے تاں جو بعد اچ کہیں کوں گلہ نہ ہووے ھک سوال دے جواب اچ انہاں آکھیے 10 لکھ 75 ہزارتوں 11 لکھ 75 ہزار روپے حج خرچے دی اساں وفاقی کابینہ توں منظوری ڳھدی ہئی ، 40 ݙینھاں دا حج 10 لکھ 50 ہزار اتے 25 ݙینھ تے محیط حج 11 لکھ روپے دا ہوسی