صدر مملکت آصف علی زرداری اتے چین دے صدر شی جن پنگ دا مشترکہ مستقبل دی پاک۔ چین کمیونٹی سانڳے عوامی روابط و ثقافتی تبادلیاں تے زور

بیجنگ۔5فروری(اے پی پی)صدر مملکت آصف علی زرداری اتے چین دے صدر شی جن پنگ دے چین دے عظیم عوامی ایوان اچ ملݨ ویلھے مشترکہ مستقبل دی پاک۔ چین کمیونٹی تکڑی کرݨ سانڳے عوامی روابط اتے ثقافتی تبادلیاں تے زور ݙتا ڳئے اتے آکھیے جو پاک چین اقتصاری راہدری نال علاقائی روابط، مشترکہ فوائد اتے خوشحالی ودھسی۔ انہاں ݙوطرفہ تعلقات دی مثبت رفتار اتے بین الاقوامی امور تے الایا۔ ملݨ توں پہلے صدر مملکت دے اعزاز اچ استقبالیہ ݙتا ڳئے، عوامی ایوان اچ چینی ٻالاں دے گروپ آصف علی زرداری دا استقبال کریندے پھلاں دا گلدستہ ݙتے۔ ایں موقع تے وفود دی سطح تے ڳآلھ مہاڑ تھئی۔ انہاں مشترکہ دلچسپی دے علاقائی و بین الاقوامی مسائل، باہمی شراکت داری دا دائرہ کار ٻیا ودھاوݨ تے ڳالھ مہاڑ کیتی۔ صدر مملکت بیلٹ اینڈ روڈ منصوبے دے تحت عالمی ترقی اچ چین دے گھاٹے تعاون تے صدر شی جن پنگ کوں زبردست خراج تحسین پیش کیتے۔ ملاقات اچ پاک چین اقتصادی راہداری 2.0 دی اعلیٰ معیار دی ترقی تے وی الایا گیا۔ وفود دی سطح تے ملاقات دا اعلامیہ وی جاری کیتا کیتے جیندے مطابق پاک چین اقتصاری راہدری نال علاقائی روابط، مشترکہ فوائد اتے خوشحالی ودھسی، ایں موقع تے صدر آصف علی زرداری چین دے صدر شی جن پنگ کوں دورہ پاکستان دی دعوت ݙتی اتے آکھیا جو پاکستان دے عوام اتے حکومت صدر شی جن پنگ کوں ہک وژنری رہنما اتے پاکستان دا خاص دوست سمڄھدن۔ ملݨ توں بعد مفاہمت دی یادداشتاں تے وی دستخط تھئین۔ تقریب اچ سائنس و ٹیکنالوجی، میڈیا، توانائی اتے سماجی و اقتصادی ترقی سودھا ٻئے شعبیاں اچ تعاون ودھاوݨ کیتے مفاہمت دی یادداشتاں تے دستخط کیتے ڳن۔ بعد اچ چین دے صدر شی جن پنگ صدر آصف علی زرداری اتے انہاں دے وفد کوں عشائیہ ݙتے۔