نجکاری عمل دی خود نگرانی کریندا پیاں ،ایں عمل اچ کوئی تعطل برداشت نہ کیتا ویسی ، وزیراعظم محمد شہبازشریف

اسلام آباد۔6فروری(اے پی پی) وزیراعظم محمد شہباز شریف نجکاری دے عمل دی معینہ مدت اچ تکمیل یقینی بݨاوݨ دی ہدایت کریندے آکھیے نجکاری دے عمل دی او خود نگرانی کریندے پئن ، ایں اچ کوئی تعطل برداشت نہ کیتا ویسی ۔ وزیراعظم دفتر میڈیا ونگ توں جاری بیان موجب اے ڳالھ وزیراعظم اپݨی زیر صدارت سرکاری اداریں دی نجکاری دے عمل اتے ایں دی نگرانی دے حوالے نال بݨائے ڳئے ٹاسک مینجمنٹ سسٹم تے جائزہ اجلاس اچ آکھی ۔ اجلاس اچ وفاقی وزراء عبدالعلیم خان، سینیٹر محمد اورنگزیب، رانا تنویر حسین، احد خان چیمہ اتے متعلقہ اعلیٰ حکام شرکت کیتی۔ اجلاس اچ وزیرِ اعظم کوں نجکاری دے حوالے نال بݨائے ڳئے ٹاسک مینجمنٹ سسٹم دا جائزہ پیش کیتا ڳئے۔ اجلاس کوں مختلف اداریں دی نجکاری دی معینہ مدت دے حوالے نال وی ݙسایا ڳئے ۔  اجلاس کوں ݙسایا ڳئے جو وفاقی حکومت دے اداریں دی نجکاری کوں ترائے مرحلیں اچ ونڈیا ڳئے ۔ پہلے مرحلے اچ 10اداریں ، ݙوجھے مرحلے اچ 13 جݙاں جو تریجھے مرحلے اچ باقی ماندہ اداریں دی نجکاری یقینی بݨائی ویسی ۔  اجلاس اچ وزیرِاعظم نجکاری دے عمل کوں تکھا کرتے معینہ مدت اچ نجکاری دے عمل دی تکمیل یقینی بݨاوݨ دی ہدایت کیتی ۔ وزیراعظم آکھیے پاکستان دی ترقی سانڳے ساریں کوں رل تے کم کرݨا اے ، پاکستانی عوام دے قیمتی وسائل دا ضیان کرݨ آلے اداریں اچ مزید زیان دی اجازت نہ ݙیساں ۔ وزیراعظم آکھیے ملکی اداریں دی نجکاری حکومت دے اڑان پاکستان اقدام دا حصہ اے،حکومت  دا کم کاروبار کرݨ کائنی بلکہ کاروبار تے سرمایہ کاری سانڳے پالیسی، اقدمات اتے سہولت ݙیوݨ اے ۔ وزیراعظم آکھیے وختی ضروری اصلاحات نال ہی معیشت دی بہتری دے پاسے تکھے ٹردے پیوں ،متعین کیتے ڳئے اداریں دی نجکاری دے عمل کوں شفافیت تے سمجھوتہ کیتے بغیر تکھا کیتا ونڄے ۔ وزیراعظم ہدایت کیتی جو نجکاری دے عمل اچ قانونی رکاوٹاں کوں ہٹاوݨ سانڳے چنڳی شہرت دے وکلاء دیاں خدمات ڳھدیاں ونڄن ۔ انہاں آکھیے نجکاری دے عمل دی خود نگرانی کریندا پیاں ، کہیں قسم دا تعطل قبول کائنی۔ وزیرِاعظم نجکاری دے عمل دی نگرانی سانڳے بݨائے ڳئے ٹاسک مینجمنٹ ڈیش بورڈ دا وی جائزہ ڳھدا۔