بزنس کمیونٹی دی سہولت سانڳے غیر ضروری رکاوٹاں ختم کرݨ دی لوڑھ اے،   قائمقام صدر سید یوسف رضا گیلانی

اسلام آباد۔6فروری(اے پی پی) قائمقام صدر مملکت سید یوسف رضا گیلانی بزنس کمیونٹی دی سہولت سانڳے غیر ضروری رکاوٹاں ختم کرݨ دی لوڑھ تے زور ݙیندے آکھیے خصوصی سرمایہ کاری سہولت کونسل سرمایہ کاراں کوں ون ونڈو سہولت ݙیندی پئی اے ۔ ایوان صدر پریس ونگ توں جاری بیان موجب قائمقام صدر اے ڳالھ نجی ہوٹل دے ریسٹورنٹ دی افتتاحی تقریب توں خطاب کریندے آکھی ۔ تقریب اچ ارکان پالیمنٹ، ممتاز تاجراں اتے ٻئی اہم شخصیات شرکت کیتی۔ قائمقام صدر مملکت آکھیے پاکستان دے نجی شعبے اچ ترقی دی وݙی صلاحیت موجود اے، ملک اچ سرمایہ کاری دے ودھارے سانڳے کاروباری برادری کوں سہولتاں ݙیوݨیاں ہوسن ۔ قائمقام صدر آکھیے پاکستان دی ثقافت ھک انڄ سنڄاݨ رکھیندی اے ، پاکستان دے پکوان دنیا اچ مقبول ہن ، رل تے پاکستان کوں ھک پرکشش سیاحتی جاہ بݨا سڳدوں ، بطور وزیر سیاحت ملک دے سیاحتی شعبے کوں انڈسٹری دا درجہ ݙتا جݙاں جو ماضی اچ بطور وزیر تے وزیر اعظم اسلام آباد اچ مختلف منصوبے مکمل کیتن۔ قائمقام صدر مملکت آکھیے بزنس کمیونٹی دی حوصلہ افزائی دی لوڑھ اے بطور وزیر ہائوسنگ ملک دے تعمیراتی شعبے دی ترقی سانڳے اقدامات کیتے ، انہاں آکھیے ملک اچ سرمایہ کاری ودھاوݨ سانڳے تاجر برادری کوں سہولتاں ݙیوݨیاں ہوسن ، ایں اقدام دے نتیجے اچ پاکستان اچ نجی شعبے دی ترقی دے بے پناہ امکان ہن ۔ سید یوسف رضا گیلانی پاکستانی کھاݨیں کوں عالمی سطح تے مقبول قرارݙیندے آکھیے ملک دی ثقافت وی ھک منفرد شناخت رکھیندی اے ۔ قائم مقام صدر تاجر برادری کوں حوصلہ افزائی سانڳے غیر ضروری رکاوٹاں کوں ہٹاوݨ دی لوڑھ تے زور ݙتا