حکومت نیک نیتی نال پیکا ایکٹ دی قانون سازی کیتی، ڈیجیٹل میڈیا تے چیک نہ ہووݨ پاروں سنگین سماجی مسئلے جنم گھن سڳدن ، وفاقی وزیر اطلاعات عطاءاللہ تارڑ

اسلام آباد۔6فروری(اے پی پی) وفاقی وزیر اطلاعات، نشریات، قومی ورثہ و ثقافت عطاءاللہ تارڑ ڈیجیٹل میڈیا کوں ریگولیٹ کرݨ سانڳے پیکا قانون دی اہمیت تے زور ݙیندے آکھیے حکومت نیک نیتی نال پیکا ایکٹ دی قانون سازی کیتی اے ، ڈیجیٹل میڈیا تے چیک نہ ہووݨ پاروں سنگین سماجی مسئلے جنم گھن سڳدن  کمیٹی مناسب سمجھے تاں صحافتی تنظیماں تے ٻئے اسٹیک ہولڈرز دے حوالے نال اجلاس سݙے ، ریڈیو پاکستان تے پی ٹی وی کوں جدید ٹیکنالوجی نال لیس کرݨ سانڳے جامع منصوبہ بندی کیتی اے ، اداریں کوں مالی بحران توں کڈھݨ سانڳے اقدامات کریندے پیوں ، وزارت دے کرایہ تے موجود دفتر ختم کرتے پاک چائنہ فرینڈ شپ سینٹر اچ منتقل کرݙتے ، صوبائی حکومتاں کوں آکھیے نجی ٹی وی چینلز وانڳوں پی ٹی وی کوں وی اشتہارات ݙتے ونڄن ۔ اے ڳالھ انہاں پریس انفارمیشن ڈیپارٹمنٹ (پی آئی ڈی) اچ رکن قومی اسمبلی پولین بلوچ دی صدارت اچ منعقدہ قومی اسمبلی دی قائمہ کمیٹی اطلاعات و نشریات دے اجلاس اچ آکھی ۔ وفاقی وزیر اطلاعات ڈیجیٹل میڈیا کوں ریگولیٹ کرݨ سانڳے پیکا قانون دی اہمیت تے زور ݙیندے آکھیے ڈیجیٹل میڈیا تے چیک نہ ہووݨ پاروں تشدد تے اکساوݨ سودھے سنگین سماجی مسئلے جنم گھن سڳدن ۔ حکومت نیک نیتی نال پیکا ایکٹ دی قانون سازی کیتی اے ۔ جے کمیٹی مناسب سمجھدی اے تاں صحافتی تنظیماں تے ٻئے اسٹیک ہولڈرز دے حوالے نال اجلاس سݙے ۔  قائمہ کمیٹی میڈیا قوانین متعلق خدشات ہٹاوݨ سانڳے سٹیک ہولڈرز بشمول پریس کلباں نال مشاورت دی اہمیت تے زور ݙتے تے آکھیے جو آندے ہفتے فالو اپ میٹنگ منعقد کیتی ویسی جیں اچ وفاقی وزیر اطلاعات و نشریات، قومی اسمبلی دی کمیٹی اطلاعات و نشریات دے چیئرمین تے میڈیا دے سٹیک ہولڈرز ایں مسئلے دا جامع حل وضع کرݨ سانڳے شامل ہوسن ۔ اجلاس دے دوران وزارت اطلاعات و نشریات دے اڄوکے مالی سال دے پی ایس ڈی پی دا جائزہ ڳھدا ڳئے ۔ وفاقی وزیر اطلاعات آکھیے ریڈیو تے پی ٹی وی کوں جدید ٹیکنالوجی نال لیس کرݨ سانڳے جامع منصوبہ بندی بݨائی اے ، دیہاتی علاقیں اچ سرکاری میڈیا نیٹ ورک کوں وسعت ݙیوݨ سانڳے اضافی بجٹ دی لوڑھ اے ، ایں بجٹ توں موجودہ الیکٹرانک آلات کوں وی اپ گریڈ کیتا ویسی انہاں آکھیے 14 ماہرین تے مشتمل تھینک ٹینک دے قیام دا وی اعلان کیتا۔ ایں اقدام سانڳے مختص کیتے ڳئے کل بجٹ 204 ملین روپے ہئی۔ وفاقی وزیر ایں ڳالھ تے روشنی پاتی جو پی ٹی وی اچ اندرلے مسئلے مکاوݨ اچ نمایاں پیشرفت تھئی اے ۔ اساں نجی میڈیا اداریں جیڑھے اپݨے عملے کوں ویلھے تے تنخواہواں دی ادائیگی کرݨ اچ ناکام رہندن ، دے برعکس اپݨے ملازمین کوں تنخواہواں دی وختی ادائیگی یقینی بݨائے ۔ وفاقی وزیر گلگت بلتستان اتے آزاد جموں و کشمیر اچ پی ٹی وی سینٹر دے وݙے منصوبے دا وی ذکر کیتے جیڑھا جو خطے دے طلباءکوں انٹرن شپ دی سہولت ݙیسی ۔ وفاقی وزیر اطلاعات پی ٹی وی سپورٹس چینل دی بہتری بارے تفصیل اچ آکھیے پی ٹی وی سپورٹس ریٹنگ اچ سارے سپورٹس چینلزتوں اڳوں ہے،  ادارے توں کرپٹ عناصر کوں ہٹا ݙتا ڳئے ھک تکڑی ٹیم بݨائی ڳئی اے جیں دے مثبت نتیجے برآمد تھئن ، گلگت بلتستان اتے آزاد جموں و کشمیر اچ کوریج ودھاوݨ تے توجہ ݙیوݨ دے نال پی ٹی وی تے ریڈیو پاکستان دی کارکردگی ودھاوݨ سانڳے کوششاں کیتیاں ویندیاں پئن ۔ انہاں پی ٹی آئی دور اچ تھیوݨ آلے مالی زیان تے ڳالھ کریندے آکھیے ھک متنازعہ ٹھیکے دے حوالے نال کیس عدالت اچ چلدا پئے، امید اے اے متنازعہ کنٹریکٹ منسوخ ہووݨ توں پی ٹی وی دی آمدݨ ݙوگنا ودھ ویسی ۔ وفاقی وزیر اطلاعات آکھیے قومی نشریاتی ادارے صوبائی حکومتاں کوں وسیع کوریج ݙیندن لیکن صوبائی حکومتاں دی طرفوں پی ٹی وی اتے ریڈیو سانڳے اشتہارات مختص نی کیتے ویندے ۔ صوبائی حکومتاں کوں آکھیے نجی ٹی وی چینلز وانڳوں پی ٹی وی کوں وی اشتہارات جاری کیتے ونڄن ۔ اجلاس اچ ریڈیو پاکستان اتے پی ٹی وی دی جائیداداں دے کرائیں دے معاملات دا وی جائزہ ڳھدا ڳئے ۔ وفاقی سیکریٹری اطلاعات عنبرین جان اجلاس کوں ݙسائے سرکاری اداریں دی جائیداد دے کرائیں دا تعین وزارت ہائوسنگ کریندی اے۔ کمیٹی ݙوہیں اداریں دے کرائے تے ڳھدیاں ڳیاں جائیداداں دی تفصیل آندے اجلاس اچ منگ ڳھدن ۔ اجلاس دا اختتام میڈیا قوانین سانڳے متوازن نقطہ نظر دی لوڑھ تے اتفاق رائے نال تھئے جیں توں اظہار رائے دی آزادی اتے جوابدہی ݙوہیں کوں یقینی بݨایا ونڄے ۔ کمیٹی ارکان پاکستان اچ میڈیا انڈسٹری کوں پیش چیلنج نال نبݨݨ سانڳے رلے کم کرݨ دا عزم کیتے ۔ اجلاس اچ کمیٹی ارکان سحر کامران، آسیہ ناز تنولی، کرن عمران ڈار، سید امین الحق، مولانا غبدالغفور حیدری دے علاوہ وفاقی سیکریٹری اطلاعات عنبرین جان، پرنسپل انفارمیشن افسر مبشر حسن سودھے وزارت دے ٻئے اعلیٰ حکام وی شرکت کیتی۔