لزبن۔10فروری(اے پی پی)صدر مملکت آصف علی زرداری پرنس رحیم الحسینی نال ملین اتے انہاں دے والد پرنس کریم آغا خان دی فوتڳی تے پرچاوݨی ݙیندے افسوس کیتے۔ انہاں پاکستان دے عوام اتے حکومت ولوں ہمدردی کریندے آکھیے جو پوری قوم ہک سچے دوست اتے عظیم انسان دوست شخصیت توں محروم تھیوݨ تے سوگوار اے، مرحوم آغا خان دی فوتڳی نال ݙاݙھا ݙکھ تھئے، پاکستان اتے عوام دی سماجی معاشی ترقی کیتے مرحوم آغا خان دا کردار ٻہوں اہم اے جیندی دور اندیش قیادت پاکستان اتے ڄڳ دے ٻئے علاقیاں دا جیوݨ بہتر کتیے، میکوں چین دے دورے اچ آغا خان دے فوت تھیوݨ دا پتا لڳے اتے میں انہاں دی انسانیت کیتے جیون دیاں خدمات کوں خراج تحسین پیش کرݨ آیاں، انسانیت کیتے مرحوم دیاں خدمات ہمیشہ یاد رکھیاں ویسن۔ صدر مملکت آصف علی زرداری امید کیتی جو پرنس رحیم الحسینی انسانیت دی خدمت دے اپݨے والد دا مشن جاری رکھسن۔ صدر پاکستان دا اے دورہ پاکستان اتے آغا خان خاندان دی ڳھاٹی سنڳت اتے پائیدار دوستی سودھا پرنس کریم آغا خان دی میراث دے دیرپا اثرات کوں ظاہر کریندے۔
