سائنس اچ تریمتیں اتے چھوہریں کوں بااختیار ٻݨاوݨ قومی ترجیح اے، وزیراعظم محمد شہباز شریف

اسلام آباد۔10فروری(اے پی پی)وزیراعظم محمد شہباز شریف آکھیے جو سائنس اچ تریمتیں اتے چھوہریں کوں بااختیار ٻݨاوݨ قومی ترجیح اے، انہاں دی ترقی اتے معاشرے اچ اہم ساڄھے داری کیتے مساوی مواقع اتے چنڳاں ماحول ݙیوݨ دی پوری کوشش اے۔ وزیراعظم سائنس اچ تریمتیں اتے چھوہریں دے عالمی ݙینھ تے اپݨے سنیہے اچ آکھیے جو ایں ݙینھ اساں سائنسی دریافتاں، اختراعات اتے قیادت دے ذریعے جدید ڄڳ ٻݨاوݨ کیتے تریمتیں اتے چھوہریں دی ودھ شرکت کوں منیندے ہیں، ایںو اری اے ݙینھ مناوݨ دا موضوع “مستقبل دی پیش رفت دا نقشہ: بہترین حالی آوݨ باقی اے”، سائنس دے شعبے اچ اڳونہی اتے ہک مساوی اتے جامع مستقبل دی تعمیر دی نشاندہی کریندے۔ یونیسکو دے ادارہ برائے شماریات (یو آئی ایس) دے مطابق ڄڳ دے محققین اچ تریمتیں دی تعداد 30 فیصد توں وی ڳھٹ اے، مصنوعی ذہانت ڄھیں جدید شعبیاں اچ اے تعداد صرف 22 فیصد اے۔ وزیراعظم آکھیے جو حکومت پاکستان اینڄھے پروگراماں کوں ترجیح ݙتی اے جیندے اچ تریمتیں دی اڳواݨی اچ سٹارٹ اپس کیتے تعاون، مہارت دی ترقی اتے تحقیقاتی فنڈنگ تئیں ودھ رسائی ہووے، ایندے اچ روبوٹکس، مصنوعی ذہانت اتے ڈیجیٹل حل، کاروبار دی حوصلہ افزائی دے پروگرام اتے وظائف شامل ہین، حکومت سائنس دے شعبے اچ تریمتیں اتے چھوہریں کوں بااختیار ٻݨاوݨ کیتے ودھ رکدار ادا کریندی پئی اے۔