وزیراعظم شہباز شریف تے آئی ایم ایف دی منیجنگ ڈائریکٹر دی ملاقات

اسلام آباد۔12فروری(اے پی پی) وزیراعظم محمد شہباز شریف تے آئی ایم ایف دی منیجنگ ڈائریکٹرکرسٹا لینا جارجیوا پاکستان سانڳے آئی ایم ایف پروگرام تے حکومتی اصلاحات دے ذریعے ملݨ آلے میکرو اکنامک استحکام تے ڳالھ مہاڑ کیتی اے جݙاں جو آئی ایم ایف دی مینجنگ ڈائریکٹر آئی ایم ایف دے تعاون نال چلݨ آلے پروگرام کوں مؤثر طریقے نال نافذ کرݨ اچ حکومتِ پاکستان دی کوششاں دی تعریف کریندے آکھیے ملکی معیشت استحکام دے بعد ترقی دے رستے تے گامزن اے۔ وزیراعظم دفتر میڈیا ونگ توں جاری بیان موجب وزیر اعظم محمد شہباز شریف تے عالمی مالیاتی فنڈ دی منیجنگ ڈائریکٹر کرسٹالینا جارجیوا دی گزریل ݙینھ ورلڈ گورنمنٹس سمٹ 2025ء دے موقع تے دبئی اچ ملاقات تھئی ۔ ملاقات اچ پاکستان دے جاری آئی ایم ایف پروگرام تے حکومتی اصلاحات دے ذریعے ملݨ آلے میکرو اکنامک استحکام تے ڳالھ مہاڑ کیتی ڳئی۔ ڳالھ مہاڑ اچ ادارہ جاتی اصلاحات دے نفاذ اتے مالیاتی نظم و ضبط کوں برقرار رکھݨ سانڳے پاکستان دے عزم کوں اجاگر کیتا ڳئے جیڑھا جو پاکستان دے معاشی استحکام دی بحالی تے ملک اچ پائیدار ترقی و مستقبل سانڳے کلیدی اہمیت رکھیندن وزیراعظم شہباز شریف آئی ایم ایف دی توسیعی فنڈ سہولت دے تحت تھیوݨ آلی پیشرفت دی اہمیت کوں اجاگر کیتے، جیں پاکستان دی معیشت کوں مستحکم تے ایں کوں طویل المدتی بحالی دے رستے تے ٹورݨ اچ کلیدی کردار نبھائے ۔ وزیراعظم شہباز شریف اصلاحات دی رفتار بالخصوص ٹیکس اصلاحات، توانائی دے شعبے دی بہتر کارکردگی اتے نجی شعبے دی ترقی جیھے اہم شعبیں اچ پیش رفت کوں برقرار رکھݨ سانڳے حکومت دے عزم دا اعادہ کیتے۔ انہاں مینجنگ ڈائریکٹر کرسٹالینا جارجیوا کوں پاکستان دے معاشی استحکام دے لائحہ عمل، مؤثر کارکردگی اتے منصوبہ بندی دی پائیداری سانڳے حکومت دے عزم دا یقین ݙیوائے جیڑھا جو پاکستان اچ جامع اتے پائیدار ترقی گھنݨ سانڳے اہم اجزا ہن ۔ کرسٹالینا جارجیوا آئی ایم ایف دے تعاون نال چلݨ آلے پروگرام کوں مؤثر طریقے نال نافذ کرݨ اچ حکومتِ پاکستان دی کوششاں دی تعریف کریندے آکھیے ملکی معیشت استحکام دے بعد ترقی دے رستے تے ٹرݨ دے نال نال پاکستان اچ افراط زر اچ کمی نال چنڳی کارکردگی دامظاہرہ کریندے پئن ۔ انہاں ایں ڳالھ دا اعتراف وی کیتے جو پاکستان معاشی بحالی گھنݨ دے بعد ترقی دے رستے تے ٹردا پئے ۔ آئی ایم ایف دی منیجنگ ڈائریکٹر ملک دے اصلاحاتی ایجنڈے تے عملدرآمد سانڳے وزیراعظم شہباز شریف دی قیادت تے ذاتی عزم دی وی تعریف کیتی، جنہاں پاکستان دے معاشی استحکام اتے ترقی گھنݨ اچ اہم کردار نبھائے۔ آئی ایم ایف دی منیجنگ ڈائریکٹر لمبی مدت معاشی استحکام یقینی بݨاوݨ سانڳے مسلسل مالیاتی نظم و ضبط، ادارہ جاتی اصلاحات تے موثر گورننس دی اہمیت تے زور ݙیندے پاکستان دے اصلاحاتی ایجنڈے دی حمایت سانڳے آئی ایم ایف دے عزم دا اعادہ کیتے۔