تریمتاں جتنیاں بااختیار ہوسن معاشرہ اتنا ہی زیادہ ترقی کریسی، ساݙی زندگیاں اچ تریمتاں دا کردار ناقابل فراموش اے،سپیکر قومی اسمبلی سردار ایاز صادق

اسلام آباد۔12فروری(اے پی پی) سپیکر قومی اسمبلی سردار ایاز صادق آکھیے تریمتاں معاشرے دی ترقی اچ نمایاں کردارنبھائے ، تریمتاں جتنیاں بااختیار ہوسن معاشرہ اتنا ہی زیادہ ترقی کریسی ، ساݙی زندگیاں اچ تریمتاں دا کردار بھلایا نی ونڄ سڳدا ،میں جݙاں پہلی واری پارلیمنٹ اچ آیا ہم اوں ویلھے تے اڄ ٻہوں فرق اے ، تریمتاں پارلیمانی کاکس دے قیام سانڳے سابق اسپیکر قومی اسمبلی فہمیدہ مرزا کوں خراج تحسین پیش کرینداں ۔ او قومی اسمبلی دی وویمن پارلیمنٹری کاکس دے اہتمام نال نیشنل وویمن ڈے دی مناسبت نال منعقدہ تقریب توں خطاب کریندے پئے ہن ۔سپیکر قومی اسمبلی سردار ایاز صادق آکھیے پارلیمنٹ دے ریکارڈ اچ قانون سازی اچ تریمتاں ساریں توں ودھ کردار نبھائے ،قومی اسمبلی دے ایوان اچ تریمت ارکان دی حاضری ساریں توں زیادہ ہوندی اے ، تریمت ممبران قومی اسمبلی تیاری نال قومی اسمبلی دی کاروائی اچ حصہ گھندن ،تریمتاں دے حقوق اتے تحفظ سانڳے ہمیشہ ساریں توں ودھ تے کم کیتے ۔ انہاں آکھیے تریمتاں زندگی دے سارے شعبیں اچ نمایاں خدمات انجام ݙیندیاں پئن ، قومی اسمبلی اچ کم کرݨ آلی تریمتاں سانڳے ٻہوں سارے اقدامات کیتن ، تریمتاں پیپس تے قومی اسمبلی توں خدمات گھن سڳدن ،اڄ تریمتاں بااختیار ہن چارے صوبیں تے وفاق اچ تریمتاں کوں نمائندگی حاصل اے، سارے مرد ممبران قومی اسمبلی تریمتاں کوں بااختیار بݨاوݨ سانڳے پرعزم ہن، ساری صوبائی اسمبلیاں اتے قومی اسمبلی اچ ہم آہنگی ضروری اے،صوبے وفاق دی اکائیاں ہن، وفاق تکڑا تھیسی تاں صوبے وی تکڑے تھیسن ،وفاق ، صوبے اتے آزاد کشمیرتے گلگت بلتستان دی اسمبلیاں اچ ہم آہنگی کوں ودھارا ݙیوݨا ہوسی ۔ سردار ایاز صاد ق آکھیے سارے صوبے آزاد کشمیر تے گلگت بلتستان میݙے دل دے ٻہوں نیڑے ہن ،اسپیکرز کانفرنس پاروں صوبیں تے وفاق اچ ہم آہنگی کوں ودھارا ملئے ،قومی اسمبلی دے قواعد و ضوابط کوں باقی صوبیں وی اپنائے ، وویمن کاکس، چائلڈ کاکس، ایس ڈی جیز، ینگ پارلیمنٹرین فورم دا قیام قومی اسمبلی دے نمایاں اقدامات ہن، صوبیں وی قومی اسمبلی دی طرز تے انہاں فورمز دے قیام تے عملدرآمد شروع کرݙتے۔