ترک صدررجب طیب اردوان دا اسلام آباد آوݨ تے فقیدالمثال استقبال، صدر مملکت آصف زرداری تے وزیر اعظم شہباز شریف نورخان ائیر بیس تے پرتپاک خیرمقدم کیتا

اسلام آباد۔13فروری(اے پی پی) ترکیہ دے صدر رجب طیب اردوان پاکستان دے  ݙو ݙینھ دے دورے تے نور خان ایئربیس پُجے تاں انہاں دا فقیدالمثال اتے شایان شان استقبال کیتا ڳئے ۔صدر مملکت آصف علی زرداری تے وزیراعظم محمد  شہبازشریف ترک رہنما دا انہایت پرتپاک خیرمقدم  کیتے۔

ترک خاتون اول وی ترک  صدر  دے رلے ہن۔ایں موقع تے خاتون اول آصفہ بھٹو زرداری، نائب وزیراعظم تے وزیر خارجہ سینیٹرمحمد اسحاق  ڈار، وزیر دفاع خواجہ محمد آصف،  وفاقی وزیراطلاعات ونشریات عطا اللہ تارڑوی موجود ہن،پاکستان دی فضائی حدود اچ داخل تھیوݨ دے بعد پاک فضائیہ دے جے ایف 17 طیاریں انہاں دا فضائی استقبال کیتا اتے انہاں دے جہاز کوں آپݨے حصار اچ اسلام آباد  گھن آئے ۔معزز مہمان دے اعزاز اچ 21 توپاں دی سلامی پیش کیتی ڳئی جیڑھے جو پاکستان تے ترکیہ وچال گھاٹے سفارتی اتےتزویراتی تعلقات دی علامت اے۔نور خان ائیر بیس تے استقبالیہ تقریب دے دوران  صدر رجب طیب اردوان اپݨے خصوصی طیارے توں لتھے تاں انہاں کوں گلدستہ پیش کیتا ڳیا ، ملٹری بینڈ دی دلکش پرفارمنس پیش کیتی ڳئی جݙاں جو پاکستان تے ترکیہ دے جھنڈے لہریندے ٻالاں دی طرفوں انہاں دا والہانہ  استقبال کیتا ڳئے ۔  ترک صدر دے دورے دے موقع تے وفاقی دارالحکومت کوں سوہݨا سجایا ڳئے سڑکاں تے چوکاں تے خیرمقدمی بینرز اتے ݙوہیں ملکاں دے پرچم لاتے ڳئن ۔ وزیراعظم محمد شہباز شریف دی دعوت تے ترکیہ دے صدر رجب طیب اردوان پاکستان دا  ݙو ݙینھ دا دورہ کریندے پئن ،صدر اردوان دے رلے اعلیٰ سطح دا وفد وی اے جیں اچ وزراء اتے اعلیٰ حکام دے علاوہ کاروباری شخصیات  شامل ہن۔  دورے دے دوران وزیراعظم شہباز شریف تے صدر رجب طیب ایردوان اڄ پاک ترک اعلیٰ سطحی سٹریٹجک کوآپریشن کونسل دے ستویں اجلاس دی مشترکہ صدارت کریسن ۔ سیشن دے مُکݨ تے ھک مشترکہ اعلامیہ  تے ٻہوں اہم معاہدیں تے تے ایم او یوز تے دستخط کیتے ونڄݨ دی توقع اے۔ صدر اردوان ،وزیراعظم شہباز شریف اتے صدر آصف علی زرداری نال وی ݙو پاسے ملاقاتاں کریسن ۔ وزیر اعظم شہباز شریف نال او پاکستان ترک بزنس اینڈ انویسٹمنٹ فورم توں خطاب کریسن جیں اچ ݙوہیں پاسوں سرکردہ سرمایہ کار، کمپنیاں تے کاروباری لوک شریک تھیسن۔