وزیراعظم اتے ترک صدر دی ملاقات، ݙوطرفہ تعلقات سٹریٹجک شراکت داری اچ وٹاوݨ دا عزم، ایچ ایل ایس سی سی اجلاس دی مشترکہ صدارت کیتی

اسلام آباد۔13فروری(اے پی پی)وزیراعظم محمد شہبازشریف اتے صدر جمہوریہ ترکیہ رجب طیب ایردوان وزیراعظم ہاؤس اسلام آباد اچ ملین۔ انہاں پاک ترک ݙوطرفہ تعلقات اچ مثبت پیشرفت تے اطمینان کریندے اپݨے تعلقات باہمی فیدہ مند سٹریٹجک شراکت داری اچ وٹاوݨ دا عزم کیتے۔ انہاں ترکیہ-پاکستان ہائی لیول سٹریٹجک کوآپریشن کونسل (ایچ ایل ایس سی سی ) دے ستویں اجلاس دی مشترکہ صدارت وی کیتی۔

رجب طیب ایردوان دا وزیراعظم ہاؤس پڄݨ تے وزیراعظم استقبال کیتے۔ ترکیہ دے صدر اپݨے اعزاز اچ گارڈ آف آنر دا معائنہ کیتے، پی اے ایف دے لڑاکا طیاریاں دا فلائی پاسٹ ݙٹھے اتے وزیراعظم ہاؤس دے احاطے اچ ہک ٻوٹا لائے۔ ملاقات اچ باہمی دلچسپی دے مختلف ݙوطرفہ، علاقائی و عالمی امور تے الایا۔ انہاں ترکیہ-پاکستان ہائی لیول سٹریٹجک کوآپریشن کونسل (ایچ ایل ایس سی سی ) دے اجلاس دی مشترکہ صدارت کیتی جیندے اچ ݙوہیں پاسو دے متعلقہ وزراء تعاون دے مختلف شعبیاں بارے 9 مشترکہ قائمہ کمیٹیاں دی پیشرفت رپورٹس پیش کیتن۔ صحت و آئی ٹی دی ݙو نویاں مشترکہ قائمہ کمیٹیاں وی اپݨیاں رپورٹیں پیش کیتن۔ پاک فوج دے سربراہ جنرل سید عاصم منیر پاکستانی اتے ترک رہنماواں دے نال نال اعلیٰ سطح سٹریٹجک کوآپریشن کونسل وچال ملاقات اچ شرکت کیتی۔

وزیراعظم ݙوہاں ملکاں وچال نتیجہ خیز اقدامات، بہتر کاروباری معاملات اتے ݙوطرفہ سرمایہ کاری سوکھی کرݨ نال ݙوطرفہ اقتصادی تعاون ٻیا تکڑا کرݨ تے زور ݙتے۔ انہاں  ترک کمپنیاں کوں پاکستان دے معاشی، تجارتی و سرمایہ کاری دے منظر نامہ دی  بے پناہ صلاحیت توں فیدہ چاوݨ اتے زراعت، نویں اتے ابھردی ٹیکنالوجیز، توانائی اتے کان کنی سودھا ٻئے شعبیاں باہمی فائدہ مند تعاون کیتے کم کرݨ دی دعوت ݙتی۔ ݙوہاں رہنماواں مشرق وسطیٰ دی حالیہ پیشرفت تے الایا جیندے اچ انہاں فلسطینی عوام نال غیر متزلزل یکجہتی دا اظہار کیتے۔ وزیراعظم ݙو ریاستی حل کیتے پاکستان دے مطالبہ دا عزم کیتے تاں جو اقوام متحدہ اتے او آئی سی دی متعلقہ قرارداداں دے مطابق 1967 توں پہلے دیاں سرحداں اتے القدس الشریف کوں ایندا دارالحکومت ٻݨاوݨ نال ہک آزاد اتے خودمختار ریاست فلسطین دے قیام دا تصور پیش کیتا گئے۔

مشترکہ اعلامیہ تے دستخط توں علاوہ ݙو طرفہ تعاون دے مختلف شعبیاں اچ 24 مفاہمت دی یادداشتاں، پروٹوکولز اتے معاہداں دے تبادلے دا وی مشاہدہ کیتے۔ انہاں ترک صدر دے اعزاز اچ اسلام آباد اچ ہک مرکزی انٹرچینج دے ناں دی تختی دی نقاب کشائی وی کیتی۔