بھارت اتے امریکہ دے بیان اچ پاکستان دا حوالہ گمراہ کن اے، بھارتی دہشت گردی دی سرپرستی تے پردہ نی پاسڳدا ، دفتر خارجہ

اسلام آباد۔14فروری(اے پی پی) پاکستان نے بھارت تے امریکہ دے سانجھے بیان اچ پاکستان دے حوالے کوں”یکطرفہ، گمراہ کن تے سفارتی اصولاں دے منافی” قرارݙیندے آکھیے او خطے تے ایں توں ٻاہر دہشت گردی، تخریب کاری اتے ماورائے عدالت قتل دی وارداتاں دی بھارتی سرپرستی تے پردہ نی پاسڳدا ۔ دفتر خارجہ دے ترجمان شفقت علی خان ہفتہ وار پریس بریفنگ اچ آکھیے امریکا نال انسداد دہشت گردی دے تعاون دے باوجود پاکستان دا حوالہ ݙتا ڳئے، ایہو سویں حوالے ایں تلخ حقیقت توں بین الاقوامی توجہ نی ہٹا سڳدے جو بھارت مسلماناں تے ٻئی اقلیتاں دے خلاف نفرت انگیز جرم دے مرتکب عناصر سانڳے محفوظ پناہ گاہ اے۔ مشترکہ اعلامیے اچ بھارت دی طرفوں اقوام متحدہ دی سلامتی کونسل دی قرارداداں تے عمل نہ کرݨ تے توجہ نی ݙتی ڳئی جیڑھا جو خطے اچ کشیدگی تے عدم استحکام دا ھک اہم ذریعہ اے اتے نہ ہی ایں وچ بھارت دے غیر قانونی مقبوضہ جموں و کشمیر اچ انسانی حقوق دی سنگین صورتحال دا نوٹس ڳھدا ڳئے ۔ افسوسناک امر اے ہے جو اے بین الاقوامی ذمہ داری توں دستبرداری دے مترادف اے۔ ترجمان امن و استحکام دے ودھارے تے دہشت گردی دے خلاف جنگ کوں منطقی انجام تئیں پڄاوݨ سانڳے علاقائی اتے عالمی کوششاں اچ تعمیری کردار نبھاوݨ دے پاکستان دے عزم دا اعادہ کیتے۔ انہاں بھارت کوں جدید فوجی ٹیکنالوجی دی منتقلی دے منصوبے تے پاکستان دی تشویش دا وی اظہار کیتے کیوں جو ایں خطے اچ فوجی عدم توازن پیدا تھی سڳدے تے تزویراتی استحکام کوں ضیان پڄ سڳدے۔ انہاں  بین الاقوامی شراکت داراں تے زور ݙتے جو او جنوبی ایشیا اچ امن و سلامتی دے معاملات تے جامع اتے معروضی نقطہ نظر اپناون تے ایجھے موقف دی توثیق توں گریز کرن جیڑھا یکطرفہ تے زمینی حقائق توں ہٹ تے ہووے ۔ ترجمان شفقت خان سعودی عرب اچ فلسطینی عوام سانڳے ھک ریاست دے قیام متعلق اسرائیلی وزیراعظم دے اڄوکے بیان دی مذمت کریندے ایں کوں “غیر ذمہ دارانہ، اشتعال انگیز تے بغیر سوچیے سمجھیے ” قرار ݙیندے آکھیے اے فلسطینی عوام دے حق خودارادیت اتے انہاں دی آپݨی تاریخی اتے قانونی سرزمین تے ھک آزاد ریاست دے جائز حقوق دی خلاف ورزی اتے نظراندازکرݨ دے مترادف اے۔ انہاں آکھیے پاکستان سعودی عرب نال یکجہتی نال کھڑے تے سعودی عرب دے غیر متزلزل موقف کوں کچا کرݨ دی کوئی وی کوشش تے فلسطینی کاز توں ایں دے عزم کوں غلط انداز اچ پیش کرݨ ٻہوں افسوسناک اے۔ انہاں آکھیے ایران، مصر، ترکی، ملائیشیا، سعودی عرب اتے متحدہ عرب امارات دے ہم منصباں نال ٹیلی فونک ڳالھ مہاڑ اچ نائب وزیر اعظم تے وزیر خارجہ اسحاق ڈار غزہ دے عوام کوں بے دخل کرݨ دی تجویز کوں ٻہوں پریشان کن اتے غیر منصفانہ قرارݙتے ایں مسئلے تے غور سانڳے او آئی سی وزرائے خارجہ دا غیر معمولی اجلاس سݙݨ سانڳے پاکستان دی حمایت دا اظہار کیتے۔ لیبیا اچ بیڑی حادثے تے میڈیا کوں ݙسیندے انہاں آکھیے ہݨ تئیں 16 لاشاں برآمد تھئن تے ہلاک تھیوݨ آلیں دی پاکستانی شہریت دی تصدیق انھاں دے پاسپورٹ دی بنیاد تے کیتی ڳئی اے انہاں آکھیے 37 لوک زندہ بچ ڳئن جنہاں اچوں ھک ہسپتال اچ زیر علاج  تے 33 پولیس حراست وچ ہن ۔ حادثے اچ تقریبا10 پاکستانی لاپتہ ہن تے زندہ بچ ونڄݨ آلے 3 لوک طرابلس وچ ہن تے سفارت خانہ انھاں دی ݙیکھ بھال کریندا پئے ۔ ترجمان مقبوضہ جموں و کشمیر اچ بھارتی فورسز کدے ظلم پاروں ݙو کشمیری نینگراں دی شہادت اتے ضلع کٹھوعہ اچ پولیس تشدد دے نتیجے اچ ھک نینگر کوں خودکشی تے مجبور کرݨ تے تشویش کیتی تے بے گناہ ہوو ݨ دے باوجود عسکریت پسنداں نال رابطے دا اعتراف کرݨ تے مجبور کیتے۔ انہاں زور ݙتےانہاں واقعات دی تحقیقات کیتی ونڄݨی چاہیدی اے تے قصورواراں توں ولدا ڳھدا ونڄے ۔ ترجمان میڈیا کوں ݙسائے نائب وزیراعظم و وزیر خارجہ سینیٹر محمد اسحاق ڈار18 فروری2025 کوں نیویارک اچ اقوام متحدہ دی سلامتی کونسل دے اعلی سطحی اجلاس اچ شرکت کریسن جیں دی صدارت چینی وزیر خارجہ کریسن ۔ ترک صدر رجب طیب اردوان دے دورہ پاکستان تے انہاں آکھیے پاک ۔ترک اعلی سطحی اسٹریٹجک تعاون کونسل دے ستویں اجلاس اچ ݙوہیں فریقین دفاع، تجارت اتے سرمایہ کاری، بینکنگ، خزانہ، تعلیم، صحت، توانائی، ثقافت، سیاحت، ٹرانسپورٹ اتے مواصلات، زراعت، پاݨی اتے سائنس و ٹیکنالوجی سودھے سارے شعبں اچ تعاون کوں مزید مستحکم کرݨ تے اتفاق کیتے ۔ ایں توں انڄ جوائنٹ ورکنگ گروپس دا ناں بدال تے قائمہ کمیٹیاں رکھ ݙتا ڳئے تے اعلیٰ سطحی تزویراتی تعاون کونسل(ایچ ایل ایس سی سی) میکانزم دے تحت سیکیورٹی، دفاع اتے انٹیلی جنس، صحت اتے سائنس و ٹیکنالوجی متعلق نویں مشترکہ قائمہ کمیٹیاں بݨائیاں ڳئن ۔  ایں توں انڄ فریقین پاکستان تے بھارت وچال سارے تصفیہ طلب جھیڑے بشمول جموں و کشمیر دے بنیادی جھیڑے کوں اقوام متحدہ دی سلامتی کونسل دی متعلقہ قرارداداں اتے کشمیری عوام دی امنگاں موجب حل کرݨ دی لوڑھ تے زور ݙتے ۔ ورلڈ گورنمنٹ سمٹ اچ شرکت سانڳے وزیر اعظم شہباز شریف دے متحدہ عرب امارات دے دورے دا حوالہ ݙیندے انہاں آکھیے متحدہ عرب امارات ، سری لنکا ، کویت تے بوسنیا ہرزیگووینا دی قیادت نال ملاقاتاں اچ ، انہاں ݙو پاسے تعاون کوں ودھاوݨ تے تجارت ، سرمایہ کاری ، بنیادی ڈھانچے اتے توانائی سودھے سانجھی دلچسپی دے شعبیں اچ شراکت داری ودھاوݨ دے موقع ڳولݨ دے طریقیں تے ڳالھ مہاڑ کیتی ۔ھک سوال تے ترجمان پاکستانی شہریاں سانڳے متحدہ عرب امارات دے ویزیں تے کہیں قسم دی پابندی کوں مسترد کرݙتے۔ تاں جو انہاں آکھیے اے کہیں وی ملک دا خودمختار استحقاق اے جو او کہیں کوں آپݨی سرزمین تے داخل تھیوݨ دی اجازت ݙیوے ۔ پی ٹی آئی دی طرفوں آئی ایم ایف کوں لکھیے ڳئے خط  تے سوال دے جواب اچ ترجمان آکھیے جے کہیں پاکستان دی معاشی خوشحالی کوں ضیان پڄاوݨ دی کوشش کیتی تاں اے افسوسناک اے۔ انہاں آکھیے آپݨے اڄوکے متحدہ عرب امارات دے دورے تے وزیراعظم شہباز شریف آئی ایم ایف دی منیجنگ ڈائریکٹر کرسٹالینا جارجیوا نال ”نتیجہ خیز” ملاقات کیتی اے ۔ یوکرین دے حوالے نال انہاں آکھیے پاکستان یوکرین اچ امن دی بحالی سانڳے کہیں وی اقدام دا خیرمقدم کریسی کیوں جو ایں جھیڑے دنیا دے ٻئے حصے وانڳوں پاکستان کوں وی متاثر کیتے۔