سیکورٹی فورسز خیبر پختونخواہ اچ ݙو مختلف آپریشنز اچ 15 خوارج کوں جہنم واصل کرݙتے، آئی ایس پی آر

راولپنڈی۔15فروری  (اے پی پی) سیکورٹی فورسز خیبر پختونخواہ اچ  ݙو مختلف آپریشنز اچ 15 خوارج کوں جہنم واصل کرݙتے۔ آئی ایس پی آر توں جاری پریس ریلیز موجب خوارج دی موجودگی دی اطلاع تے سکیورٹی فورسز ولوں ضلع ڈیرہ اسماعیل خان دے علاقے ہتھالہ اچ انٹیلی جنس  معلومات تے مبنی آپریشن کیتا ڳئیا۔ آپریشن اچ  بہادر اہلکاراں  خوارج دے ٹکاݨے کوں نشانہ ٻݨایا اتے ایندے اچ 9 خوارج بشمول خارجی  گروپ  دے لیڈر  فرمان عرف ثاقب، خارجی امان اللہ عرف طوری، خارجی سعی عرف لیاقت اتے خارجی بلال کوں جہنم واصل کر ݙتا ڳئے۔ ماریے ڳئے خوارج علاقے اچ دہشت گردی دی کئی کاروائیاں اچ ملوث ہن۔ شمالی وزیرستان دے ضلع میران شاہ دے  علاقے اچ کیتے ڳئے ہک ٻئے آپریشن اچ سیکیورٹی فورسز 6 خوارج کوں جہنم واصل کیتے۔ جڈانجو شدید فائرنگ اچ لیفٹیننٹ محمد حسن ارشف (عمر: 21 سال، ساکن ضلع لاہور) آپݨے دوستاں دی فرنٹ لائن دی قیادت کریندیں ہوئیں بہادری نال لڑدیں ہوئیں آپݨے ترائے جواناں نال شہید تھی ڳئے۔ جان دا نذرانہ ݙیوݨ آلیاں اچ نائب صوبیدار محمد بلال (عمر: 39 سال، رہائشی ضلع ڈیرہ اسماعیل خان)، سپاہی فرحت اللہ (عمر: 27 سال،  رہائشی ضلع لکی مروت ) اتے سپاہی ہمت خان (عمر: 29 سال، ضلع مہمند دا رہائشی) شامل ہن۔ آئی ایس پی آر آکھیا جو پاکستان دی سکیورٹی فورسز دہشت گردی دی لعنت کوں ختم کرݨ کیتے پرعزم اے۔