اسلام آباد۔18فروری (اے پی پی) وفاقی وزیر اطلاعات، نشریات، قومی ورثہ تے ثقافت عطاء اللہ تارڑ سعودی میڈیا فورم دے چوتھے ایڈیشن اچ شرکت کیتے ریاض پڄ ڳئے۔ منگل کوں کنگ عبداللہ ایئرپورٹ تے سعودی عرب دے نائب وزیر برائے میڈیا ڈاکٹر عبدالرحمان وفاقی وزیر اطلاعات عطاء اللہ تارڑ دا استقبال کیتا۔ ایں موقع تے ڳالھ مہاڑ کریندیں ہوئیں وفاقی وزیر اطلاعات عطاء اللہ تارڑ آکھیا جو سعودی عرب پاکستان دا دوست اے، پاکستان اتے سعودی عرب وچال تاریخی اتے ثقافتی تعلقات ہن۔ انہاں آکھیا جو سعودی عرب دے شاہ سلمان بن عبدالعزیز اتے ولی عہد شہزادہ محمد بن سلمان دا ترقی تے خوشحالی کیتے وژن مثالی اے۔ انہاں آکھیا جو معاشی ترقی اتے کاروباری سرگرمیاں اچ ودھارے کیتے سعودی عرب دے اقدامات قابل تعریف ہن۔ انہاں آکھیا جو سعودی میڈیا فورم سعودی عرب دے میڈیا بارے تجربیاں توں فیدہ چاوݨ دا اہم پلیٹ فارم اے۔ سعودی میڈیا فورم دے تحت ترائے روزہ کانفرنس 19 توں 21 فروری تئیں ریاض اچ تھیندی پئی اے۔ سعودی میڈیا فورم اچ پوری دنیا توں عالمی شخصیات سودھے میڈیا توں تعلق رکھݨ آلی اہم شخصیات شریک تھیندی پئن۔ فورم اچ آرٹیفیشل انٹیلیجنس، صحافت دا مستقبل، میڈیا اکنامکس، ڈیجیٹل نظام، مس انفارمیشن، انٹرٹینمنٹ انڈسٹری اتے ڈیجیٹل سٹریمنگ سویں اہم موضوع تے مباحثے تھیسن۔ وفاقی وزیر اطلاعات عطاء اللہ تارڑ فورم اچ شریک تھیوݨ آلی اہم شخصیات نال ملاقاتاں وی کریسن۔
