اسلام آباد۔18فروری(اے پی پی)صدر مملکت آصف علی زرداری پاکستان دے علاقائی روابط و اقتصادی تعاون کوں بیا تکڑا کرݨ دا عزم دوہریندے آکھیے جو چین پاکستان اقتصادی راہداری (سی پیک) اتے گوادر بندرگاہ خطے اچ تجارت اتے خوشحالی ودھاوݨ کیتے اہم کردار ادا کریسن۔ اے ڳالھ انہاں ایوانِ صدر اسلام آباد اچ پاکستان چین انسٹی ٹیوٹ ولوں بین الاقوامی کانفرنس “علاقائی روابط اتے پاکستان: ابھرتے مواقع” دے اجلاس نال خطاب اچ آکھی۔ تقریب اچ وزیر اعلیٰ بلوچستان سردار سرفراز بگٹی، پاکستان چین انسٹی ٹیوٹ دے چیئرمین سینیٹر مشاہد حسین سید، متحدہ عرب امارات اچ قائم گلوبل کونسل آف ٹالرنس اینڈ پیس دے صدر احمد جروان المحمد، سفارتی برادری دے ارکان، ماہرین تعلیم اتے میڈیا نمائندگان شرکت کیتی۔ کانفرنس نال خطاب اچ صدر مملکت آکھیا جو سی پیک اتے گوادر بندرگاہ ساݙیاں آوݨ آلیاں نسلاں کیتے موثر ثابت تھیسن، پاکستان تاجکستان توں بلوچستان تئیں پانی ڳھن آوݨ دے اقدامات کریندا پئے جیندے کیتے متحدہ عرب امارات دی حکومت دے تعاون نال ہک فزیبلٹی اسٹڈی مکمل کیتی ڳئی اے۔ انہاں تاریخی تجارتی راستے بحال کرݨ تے زور ݙیندے آکھیے جو ایندے نال خطے اچ اقتصادی و ثقافتی روابط ٻئے تکڑے تھیسن۔
