نیویارک ؍ اسلام آباد۔19فروری (اے پی پی) نائب وزیراعظم اتے وزیر خارجہ سینیٹر محمد اسحاق ڈار سعودی عرب دے نائب وزیر خارجہ انجینئر ولید عبدالکریم الخیریجی نال نیویارک اچ ملاقات کیتی۔ بدھ کوں دفترخارجہ توں جاری بیان موجب نائب وزیراعظم پاکستان اتے سعودی عرب دے پراݨے تعلقات دی تعریف کریندیں ہوئیں سعودی عرب نال ݙوپاسہ اقتصادی اتے سکیورٹٰی تعاون کوں ٻیا مضبوط ٻݨاوݨ دا عزم کیتا۔ انہاں ولی عہد اتے سعودی عرب دے وزیر اعظم شہزادہ محمد بن سلمان اتے شاہ سلمان بن عبدالعزیز السعود دی دور اندیش قیادت اچ سعودی عرب ولوں کیتی ڳئی قابل ذکر پیش رفت دی تعریف کیتی۔ ݙوہیں رہنماواں غزہ اتے مغربی کنارے دی سنگین انسانی صورتحال سودھے مشرق وسطیٰ دی اڄوکی پیش رفت تے وی ڳالھ کیتی۔ ملاقات اچ آپسی خوشحالی اتے علاقائی استحکام کیتے کثیر جہتی سانجھے داری کوں ودھاوݨ کیتے پاکستان اتے سعودی عرب دے سانجھے عزم دا اعادہ کیتا۔
