راولپنڈی۔19فروری (اے پی پی) پاک فوج دے سربراہ جنرل سید عاصم منیر سرکاری دورہ تے برطانیہ پڄ ڳئن۔ او علاقائی استحکام کانفرنس اچ شریک تھیسن۔ پاک فوج دے شعبہ تعلقات عامہ آئی ایس پی آر موجب دورہ برطانیہ اچ آرمی چیف رائل ملٹری اکیڈمی اچ ستویں علاقائی استحکام کانفرنس اچ شریک تھیسن۔ علاقائی استحکام کانفرنس رائل ملٹری اکیڈمی سینڈ ہرسٹ اچ تھیندی پئی اے۔ ’’ابھردا عالمی نظام اتے پاکستان دا مستقبل‘‘ دے عنوان تے کلیدی خطاب کریسن۔ اے کانفرنس پاکستان اتے برطانیہ وچال ݙوپاسہ تعاون ودھاوݨ کیتے ہر سال تھیندی اے۔ علاقائی استحکام کانفرنس پاک برطانیہ فوجی سطح تے ڳالھ مہاڑ دا اہم پلیٹ فارم اے۔ عالمی منظر نامہ اچ تیزی نال تبدیلی تے اڄوکی کانفرنس خصوصی اہمیت رکھیندی اے۔ ایں توں پہلے دورے دے پہلے ݙینھ آرمی چیف سید عاصم منیر کوں شاہی ہارس گارڈز پریڈ گراؤنڈ اچ شاندار استقبالیہ ݙتا ڳئے جتھ انہاں کوں گارڈ آف آنر پیش کیتا ڳئے۔ چاق و چوبند دستے آرمی چیف کوں انتہائی شاندار انداز اچ سلامی پیش کیتی۔ انہاں دی مصروفیات اچ برطانوی چیف آف ڈیفنس سٹاف ایڈمرل ٹونی ریڈیکن، برطانوی آرمی دے چیف آف جنرل سٹاف جنرل سر رولینڈ واکر اتے برطانیہ دے نیشنل سکیورٹی ایڈوائزر جوناتھن نکولس پاول نال ملاقاتاں شال ہن۔ آرمی چیف برطانوی ہوم سیکرٹری یویٹ کوپر نال وی ملاقات کریسن۔ آپݨے دورے اچ آرمی چیف برطانوی فوج دی اہم یونٹس بشمول لینڈ وارفیئر سینٹر اتے 1 اسٹرائیک بریگیڈ دا وی دورہ کریسن جتھ انہاں برطانوی فوج دی جدید کاری دی کوششاں اتے آپریشنل حکمت عملیاں تے بریفنگ ݙتی ویسی۔
