ریاض۔ 19 فروری(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ اتے سعودی عرب دے وزیر برائے میڈیا سلمان بن یوسف الدوسیری ملین۔ انہاں ݙوہاں ملکاں وچال مشترکہ پروڈکشن، گانے، فلم اتے ڈاکومنٹریز ٻݨاوݨ کیتے جوائنٹ کمیٹی تشکیل ݙیوݨ، صحافتی وفداں دے تبادلے اتے تربیتی پروگراماں سودھا مختلف شعبیاں اچ تعاون ودھاوݨ تے اتفاق کیتے۔ وفاقی وزیر اطلاعات پاکستان اتے سعودی عرب وچال میڈیا دے شعبیاں اچ تعلقات ودھاوݨ اتے مشترکہ تعاون دے امکانات تے الیندے غلط معلومات اتے پروپیگنڈے نال نمٹݨ کیتے رل تے ٹرݨ تے زور ݙتے۔ وفاقی وزیر اطلاعات آکھیے جو باہمی تعاون نال خطے اچ امن و استحکام ودھاوݨ، مختلف شعبیاں اچ تعلقات تکڑے کرݨ، ڈیجیٹل سرمایہ کاری و تکنیکی تعاون اچ مدد ملسی۔ انہاں آکھیا جو سعودی میڈیا فورم دی اے کانفرنس پاکستان ہی نئیں پورے ڄڳ دے میڈیا کیتے باہمی تعاون دیاں نویاں راہیں ڳولݨ اچ اہم ثابت تھیسی۔ انہاں سعودی عرب ویژن 2030 اہداف دی تعریف کریندے آکھیا جو سعودی ولی عہد شہزادہ محمد بن سلمان سعودی عرب دی مثالی ترقی اچ تاریخی کردار نٻھائے جیندے نال سعودی عرب ہر شعبے اچ مثبت سرگرمیاں دا مرکز ٻݨدا پئے۔ ملاقات اچ سعودی وزیر برائے میڈیا آکھیا جو سعودی پاکستان سپریم کوآرڈینیشن کونسل دی اگلی ملاقات پاکستان اچ تھیسی، پاکستان نال اطلاعات سودھا ٻئے اہم شعبیاں اچ تعاون ودھاوݨ ترجیح اے۔
