رباط ۔20فروری (اے پی پی) وفاقی وزیر مواصلات عبدالعلیم خان یواین سیکرٹری جنرل دے نمائندے جان ٹوڈٹ اتے یورپی کمیشن کیتے یو این دی ایگزیکٹو سیکرٹری ٹٹیانا مولکین نال مراکش اچ ملاقاتاں کیتی جئیں اچ پاکستان اچ ذرائع مواصلات تے بریفنگ ݙتی ڳئی اتے شاہرات کوں محفوظ ٻݨاوݨ اتے روڈ سیفٹی دے عالمی معیار دے نفاذ دی اہمیت تے ڳالھ مہاڑ کیتی ڳئی۔ منگل کوں جاری بیان موجب وفاقی وزیر عبدالعلیم خان نال یواین سیکرٹری جنرل دے نمائندے جان ٹوڈٹ پاکستان اتے ٻئے ملکاں اچ روڈ انفراسٹرکچر تے ڳالھ مہاڑ کیتی۔ وفاقی وزیر آکھیا جو پاکستان اچ ذرائع مواصلات کوں عالمی معیار دے مطابق کیتا ویندا پئے۔ موٹرویز تے ایم ٹیگ اتے ای ٹکٹنگ داموثر نفاذ اے۔ انہاں آکھیا جو موبائل ایپ، ٹریول ایڈوائزی، سڑکاں دی صورتحال اتے موسمیاتی اطلاعات سویں معلومات دی فراہمی کوں یقینی ٻݨایا ویندا پئے۔ وفاقی وزیر عبدالعلیم خان اتے جان ٹوڈٹ وچال اڄوکے عالمی حالات تے وی ڳالھ مہاڑ تھئی۔
