اسلام آباد۔20فروری (اے پی پی) وفاقی وزیرداخلہ تے انسداد منشیات محسن نقوی نال پاکستان اچ قطر دے سفیرعلی مبارک علی عیسی الخطیر ملاقات کیتی جئیں اچ ݙوپاسہ تعلقات، مختلف شعبیاں اچ تعاون ودھاوݨ، قطر اچ قید پاکستانی شہریاں دی رہائی بارے ڳالھ مہاڑ کیتی ڳئی۔ قطر دے سفیر وزیر داخلہ محسن نقوی کوں قطر دے دورے دی دعوت ݙتی۔ وزیر داخلہ محسن نقوی آکھیا جو قطر نال ٻہوں نیڑے دے تعلقات ہن۔ جلدی قطر دا دورہ کر تے قطری ہم منصب نال ملاقات کریساں۔ انہاں آکھیا جو انسداد منشیات بارے خلیجی ملکاں دی کانفرنس اپریل اچ اسلام آباد اچ تھیندی پئی اے۔ ایں کانفرنس اچ قطر دے انسداد منشیات ڈیپارٹمنٹ دے سربراہ کوں شرکت دی دعوت ݙتی ڳئی اے۔
