دبئی۔20فروری (اے پی پی) آئی سی سی چیمپئنز ٹرافی 2025 دی ایونٹ ٹیکنیکل کمیٹی امام الحق کوں فخر زمان دی ڄاہ تے پاکستانی سکواڈ اچ شامل کرݨ دی منظوری ݙے ݙتی اے۔ آئی سی سی موجب پی سی بی امام الحق کوں فخر زمان دے متبادل دے طور نامزد کیتا ہئی جیڑھے جو نیوزی لینڈ دے خلاف میچ اچ فیلڈنگ کریندیں ہوئیں انجرڈ تھی ڳئے ہن۔ امام الحق چیمپئنز ٹرافی دے شروع توں پہلے وارم اپ میچاں اچ پاکستان شاہینز اچ شامل ہن اتے انہاں جنوبی افریقا دے خلاف میچ اچ 98 رنز دی شاندار اننگز وی کھیݙی ہئی۔ امام الحق ہݨ تئیں 72 ون ڈے مچیاں اچ 48.27 دی اوسط نال 3138 رنز ٻݨائن جئیں اچ نو سنچریاں اتے 20 نصف سنچریاں شامل ہن۔
