اسلام آباد۔21فروری(اے پی پی)وزیراعظم محمد شہباز شریف آکھیے جو پاکستان دی افرادی قوت ملک دا اصل ترکہ اے، نینگراں کوں عالمی سطح تے عر مند ٻݨاوݨ ترجیح اے، پاکستان اچ نرسنگ دی تربیت کیتے اداریاں دی تعداد اتے استعداد ودھائی ویسی۔ اے ڳالھ انہاں نوجوان افرادی قوت دی پیشہ وارانہ تربیت بارے بین الوزارتی جائزہ اجلاس دی اڳواݨی کریندے آکھی۔ اجلاس اچ نیوٹیک، وزارت انفارمیشن ٹیکنالوجی، وزارت سمندر پار پاکستانی اتے وزارت صحت نوجواناں دی پیشہ وارانہ تربیت بارے آندے 3 سال دی حخمت عملی پیش کیتی جو نیوٹیک ایں سال ہݨ تئیں 60 ہزار اتے جون 2025 تئیں ہک لکھ 41 ہزار نوجواناں کوں آئی ٹی سودھا مختلف شعبیاں اچ پیشہ وارانہ تربیت ݙیسی، نیوٹیک دے ذریعے پاکستانی تربیتی اداریاں دی مختلف بین الاقوامی اداریاں توں ایکریڈیٹیشن وی جاری اے۔ اجلاس اچ ملکی صنعت دی لوڑھ سانڳے ہنرمند و پیشہ وارانہ تربیت دے سروے، جدید نصاب دے اطلاق، مقامی اداریاں دی ایکریڈیٹیشن اتے ٹرینرز دی لائسنسنگ تے بریفنگ ݙتی ڳئی۔اے تربیتی پروگرامز چارے صوبیاں، گلگت بلتستان اتے آزاد کشمیر اچ وی پیش کیتے ویسن۔ اجلاس اچ وزارت آئی ٹی پورے ملک اچ آندے 3 سال اچ 92 ہزار توں ودھ نینگراں کوں جدید آئی ٹی کورسز اچ تربیت اتے 21 لکھ فری لانسرز تیار کرݨ دے ہدف سانڳے اقدامات دا ݙسایا۔ اجلاس اچ نیشنل آئی سی ٹی سکلز ایکوسسٹم دے قیام تے وی بریفنگ ݙتی گئی اتے نرسنگ شعبے اچ تربیتی پروگرامز، نرسنگ دی طلب اتے پاکستانی نرساں دی بیرون ملک روزگار سانڳے لوڑھ تے بریفنگ ݙتی گئی۔ وزیراعظم نرسنگ سکولز دی تعداد ودھاوݨ اتے تربیت دا معیار چنڳاں کرݨ دی ہدایت کیتی۔ اجلاس اچ وفاقی وزراء احد خان چیمہ، چوہدری سالک حسین، وزیرِ مملکت آئی ٹی شزہ فاطمہ خواجہ، وزیرِ اعظم دے کوآرڈینیٹر برائے صحت ڈاکٹر مختار احمد بھرتھ، چیئرمین ایچ ای سی ڈاکٹر مختار احمد اتے متعلقہ اعلیٰ حکام شرکت کیتی۔
