اسلام آباد۔24فروری (اے پی پی) وزیر اعظم دی معاون برائے موسمیاتی تبدیلی، رومینہ خورشید عالم آکھیا جو موسمیاتی تبدیلی پاروں پوری دنیا اچ آبی وسائل تے دباؤ ودھدا پئے۔ اسلامی ملکاں اچ پاݨی دے وسائل دی حفاظت اتے سانجھی ترقی دے وژن کیتے تعاون کوں مستحکم کرݨ دی لوڑھ اے۔ اے ڳالھیں انہاں اسلامی ممالک دے آبی مراکز بارے ݙو ݙینھ دی نیٹ ورکنگ اجلاس دی افتتاحی تقریب توں خطاب کریندیں ہوئیں آکھی۔ رومینہ خورشید عالم عالمی سطح تے پاݨی دے تحفظ اتے آبی وسائل دے انتظام دی اہمیت تے روشنی پاتی۔ انہاں اسلامی ملکاں تے زور ݙتا جو پاݨی دے وسائل دی حفاظت اتے سانجھی ترقی کیتے تعاون کوں مستحکم کروں تانجو ایں سنگین بحران نال نبڑیا ونڄ سڳے۔
