باکو۔24فروری(اے پی پی) وزیراعظم محمد شہباز شریف تے آذربائیجان دےصدر الہام علیوف ݙوہیں ملکاں وچال سٹریٹجک شراکت داری تے اطمینان دا اظہار کریندے انہاں وچال نیڑے ، تاریخی تعلقات کوں مزید تکڑا کرݨ دا عہد کیتے ۔ انہاں ݙوہیں ملکاں وچال توانائی، انفراسٹرکچر تے مواصلات تے علاقائی رابطے دے شعبیں اچ تعاون ودھاوݨ تے مختلف شعبیں اچ سانجھی تجارت ودھاوݨ تے اتفاق کیتے ۔ وزیراعظم دفتر دے پریس ونگ توں جاری بیان موجب وزیراعظم محمد شہباز شریف تے آذربائیجان دے صدر الہام علیوف وچال ݙوپاسے ملاقات تھئی۔ وزیر اعظم صدر الہام علیوف دی دعوت تے آذربائیجان دے سرکاری دورے تے ہن ۔ زوولبا صدارتی محل پڄݨ تے وزیر اعظم شہباز شریف دا صدر الہام علیوف پرتپاک استقبال کیتے۔ آذربائیجان دی مسلح افواج دے چاق و چوبند دستے وزیراعظم کوں گارڈ آف آنر پیش کیتے تے ݙوہیں ملکاں دے قومی ترانے وڄائے ڳئں ۔ ملاقات اچ ݙوہیں رہنماواں دی طرفوں پاکستان اتے آذربائیجان وچال ٻہوں شعبیں اچ ݙوپاسے تعاون تکڑا کرݨ دا عزم کیتے ۔ وزیراعظم شہباز شریف اتے آذربائیجان دے صدر پاکستان تے آذربائیجان وچال سٹریٹجک شراکت داری تے اطمینان دا اظہار کیتے تے ݙوہیں ملکاں وچال نیڑے ، تاریخی تعلقات مزید تکڑے کرݨ داعہد کیتے ۔ ݙوپاسے ملاقات دے بعد پاکستان تے آذربائیجان دے وفد دی ملاقات تے ڳالھ مہاڑ تھئی جیں اچ ݙوہیں پاسوں دے اہم وزرا اتے اعلی حکام شرکت کیتی۔ ڳالھ مہاڑ اچ ݙوہیں پاسوں اقتصادی تعاون، تجارت اتے سرمایہ کاری مزید ودھاوݨ دا عزم کیتے ۔ ݙوہیں ملکاں توانائی، انفراسٹرکچر اتے مواصلات تے علاقائی رابطے دے شعبیں اچ تعاون دے ودھارے تے اتفاق کیتے۔ طرفین ایں ڳالھ تے اتفاق کیتے جو موجودہ تجارت دا حجم برادرانہ سیاسی تعلقات دی حقیقی صلاحیت موجب کائنی ۔ فریقین مختلف شعبیں اچ سانجھی تجارت ودھاوݨ تے اتفاق کیتے۔ ݙوہیں رہنماواں اقوام متحدہ (یو این)، اسلامی تعاون تنظیم (او آئی سی) اتے اقتصادی تعاون تنظیم (ای سی او) سودھے کثیرالجہتی فورمز تے پاکستان اتے آذربائیجان وچال فعال تعاون تے اطمینان کیتے ۔ وزیراعظم شہباز شریف صدر الہام علیوف دی طرفوں انہاں دے گزریل دورہ پاکستان اچ آذربائیجان دی 2 ارب ڈالر دی سرمایہ کاری دے اعلان دی تعریف کیتی تے انہاں ممکنہ منصوبیں تے ڳالھ مہاڑ کیتی جیڑھی سرمایہ کاری سانڳے تیار ہن ۔ صدر الہام علیوف اپریل اچ پاکستان آوݨ تے انہاں معاہدیں کوں با ضابطہ شکل ݙیوݨ دا عزم کیتے ۔ وزیر اعظم شہباز شریف اقوام متحدہ دی سلامتی کونسل دی متعلقہ قرارداداں موجب کشمیری عوام دے حق خودارادیت گھنݨ سانڳے جموں و کشمیر دے مسئلے تے آذربائیجان دی مسلسل حمایت تے شکریہ ادا کیتے۔وزیراعظم نگورنو کاراباخ دے مسئلے تے آذربائیجان کوں پاکستان دی غیر متزلزل حمایت دا اعادہ کیتے تے ایں ڳالھ تے اطمینان کیتے جو صدر الہام علیوف دی جرات مندانہ قیادت اچ آذربائیجان کامیابی نال کاراباخ کوں آزاد کرا ڳھدے، اے آذربائیجان ہی دا علاقہ اے جیں دی اقوام متحدہ دی ٻہوں قرارداداں اتے بین الاقوامی قانون دے ذریعے توثیق کیتی ڳئی اے ۔ وزیراعظم محمد شہباز شریف تے صدر الہام علیوف مختلف شعبیں اچ تعاون ودھاوݨ سانڳے معاہدیں اتے مفاہمت دی یادداشتاں دے تبادلے دی تقریب اچ شرکت کیتی۔پاکستانی وفد اچ نائب وزیراعظم و وزیر خارجہ محمد اسحاق ڈار، وزیرتجارت جام کمال خان، وزیر سرمایہ کاری و نجکاری عبدالعلیم خان، وزیر سمندر پار پاکستانیز و انسانی وسائل دی ترقی چوہدری سالک حسین، وزیر اطلاعات و نشریات عطاء اللہ تارڑ تے وزیراعظم دے معاون خصوصی سید طارق فاطمی شامل ہن۔
