اسلام آباد۔24فروری(اے پی پی) وزیراعظم دے کوآرڈینیٹر صحت ڈاکٹر مختار بھرتھ آکھیے پاکستان کوں پولیو فری بݨاوݨ اچ والدین دا کردار اہم اے، پولیو وائرس روکݨ سانڳے سارے سٹیک ہولڈرز اپݨی جاری کوششاں تکھیاں کرن۔ اے ڳالھ انہاں نیشنل ایمرجنسی آپریشن سینٹر دا دورہ کرݨ دے موقع تے آکھی اے۔ ایں موقع تے پولیو پروگرام دی طرفوں پولیو مکاوݨ دیاں کوششاں تے پیش آندے چیلنج تے تفصیلی بریفنگ ݙتی ڳئی ۔ انہاں آکھیے افغان سرحدی یونین کونسلز اچ ہدفی ویکسی نیشن مہم 24 توں 28 فروری تئیں جاری اے ۔ کراچی تے کوئٹہ بلاک اچ ایف آئی پی وی مہم جاری اے جیں اچ 10 لکھ توں ودھ ٻالاں دی ویکسی نیشن دا ہدف مقرر کیتا ڳئے ۔ ڈاکٹر مختار بھرتھ آکھیے وزیراعظم دی قیادت اچ وزارتِ صحت پولیو مُکاوݨ سانڳے پُرعزم اے،پولیو مُکاوݨ سانڳے مؤثر اقدامات جاری ہن۔انہاں آکھیے پولیو مہم دے دوران کوئی ٻال ویکسی نیشن توں محروم نہ رہے،پولیو وائرس روکݨ سانڳے سارے سٹیک ہولڈرز اپݨی جاری کوششاں کوں مزید تکھا کرن ۔انہاں آکھیے اساں سارے رل تے پاکستان کوں پولیو توں پاک بݨاوݨ اچ آپݨا کلیدی کردار نبھاؤں ،پاکستان کوں پولیو فری بݨِاوݨ اچ والدین دا کردار ٻہوں اہم اے۔
