باکو۔24فروری(اے پی پی) وزیراعظم محمد شہبازشریف آکھیے آذربائیجان دے صدر نال پاکستان اچ سانجھے فیدہ مند منصوبیں اچ آذربائیجان دی 2 ارب ڈالر دی سرمایہ کاری دے پورٹ فولیو کوں حتمی شکل ݙیوݨ سانڳے وسیع ڳالھ مہاڑ کیتی اے ، اساں پاکستان-آذربائیجان سٹریٹجک پارٹنرشپ کوں تکڑا بݨاوݨ سانڳے آپݨا سانجھاعزم کیتے جیں توں نہ صرف ݙوہیں ملکاں کوں فیدہ تھیسی بلکہ علاقائی امن تے خوشحالی اچ وی مدد ملسی۔ سوشل میڈیا ایکس تے آپݨی پوسٹ اچ وزیراعظم آکھیے اڄ باکو اچ آپݨے پیارے بھرا صدر الہام علیوف نال ھک شاندار ملاقات کیتی، میں اپݨے اتے اپݨے وفد سانڳے انہاں دی مہمان نوازی کیتے انہاں دا شکریہ ادا کیتے۔انہاں آکھیے ساݙی ڳالھ مہاڑ برادرانہ ماحول اچ تھئی اے ، ساݙی توجہ خاص طور تے تجارت، توانائی، دفاع اتےعلاقائی رابطے سودھے ݙو پاسے تعاون ودھاوݨ تے مرکوز رہی۔ انہاں آکھیے میکوں خوشی اے جو اساں پاکستان اچ سانجھے فیدہ مند منصوبیں اچ آذربائیجان دی 2 ارب ڈالر دی سرمایہ کاری دے پورٹ فولیو کوں حتمی شکل ݙیوݨ سانڳے وی وسیع ڳالھ مہاڑ کیتی اے تے میں ایں سرمایہ کاری متعلق تاریخی معاہدیں تے دستخط کرݨ سانڳے آپݨے پیارے بھرا صدر علیوف دے اڄوکے سال اپریل اچ انھاں دے دورہ پاکستان دا منتظر ہاں۔ وزیراعظم آکھیے اساں پاکستان-آذربائیجان سٹریٹجک پارٹنرشپ کوں تکڑا بݨاوݨ سانڳے آپݨا سانجھا عزم کیتے جیں توں نہ صرف ݙوہیں ملکاں کوں فیدہ تھیسی بلکہ علاقائی امن تے خوشحالی اچ وی مدد ملسی۔
