اسلام آباد۔24فروری(اے پی پی) وزیراعظم محمد شہباز شریف جمہوریہ ازبکستان دے صدر شوکت مرزیوئیف دی دعوت تے صبحائیں منڳل کوں ازبکستان دا 2 ݙینھ دا سرکاری دورہ کریسن۔ دفتر خارجہ توں جاری بیان موجب وزیراعظم محمد شہباز شریف جمہوریہ ازبکستان دے صدر شوکت مرزیوئیف دی دعوت تے 25 تے 26 فروری کوں ازبکستان دا سرکاری دورہ کریسن ۔ وزیراعظم دے رلے ھک اعلیٰ سطحی وفد ہوسی جیں اچ نائب وزیر اعظم و وزیر خارجہ تے انہاں دی کابینہ دے ٻئے ارکان وی شامل ہوسن۔ وزیراعظم پاکستان تے ازبکستان دے صدر ملاقات اچ ݙوپاسے تعاون دے سارے شعبیں جیں اچ رابطے ، اقتصادی، تجارت، سرمایہ کاری، توانائی، دفاع اتے سلامتی، علاقائی استحکام اتے تعلیم تے ڳالھ مُہاڑ کریسن ۔ ݙوہیں رہنما سانجھی دلچسپی دے علاقائی تے بین الاقوامی امور تے وی ڳالھ مُہاڑ کریسن ۔ دورے دے دوران کئی ݙوطرفہ معاہدیں/ایم او یوز تے وی دستخط کیتے ویسن ۔وزیراعظم پاکستان ازبکستان بزنس فورم توں وی خطاب کریسن۔ ݙوہیں ملکاں دے سرکردہ تاجر بزنس فورم اچ شرکت کریسن اتے ݙوپاسے تجارت کوں مزید ودھاوݨ سانڳے بی 2 بی ملاقاتاں کریسن ۔پاکستان تے ازبکستان تاریخ، ثقافت، مذہب اتے امن تے ترقی سانڳے اپݨی خواہشات دے مشترکہ ڳانڈھے اچ ڳھنڈیے ہوئن ۔وزیراعظم دا دورہ علاقائی انضمام اتے اقتصادی خوشحالی دے تذویراتی وژن دے حصے دے طور تے زیادہ اقتصادی تعاون کوں ودھارا ݙیوݨ تے شراکت داری دے نویں رستے ڳولݨ دے ذریعے ازبکستان نال آپݨے تعلقات کوں مزید مستحکم کرݨ دے پاکستان دے عزم دی نشاندہی کریندے۔
