سیالکوٹ۔24فروری(اے پی پی) وزیر دفاع خواجہ محمد آصف آکھیے میڈیکل گریجویٹس میڈیکل پروفیشن دی حرمت دی بحالی سانڳے حلف دی پاسداری کرن، میڈیکل دی تعلیم گھنݨ آلے گریجویٹس سانڳے نیک خواہشات ہن۔ اے ڳالھ انہاں خواجہ محمد صفدر میڈیکل کالج سیالکوٹ دے چوتھے کانووکیشن 2025ء توں خطاب اچ آکھی۔ انہاں آکھیے 60 دے ݙھاکے اچ میݙے والد خواجہ محمد صفدراے ہسپتال بݨوایا، وزیراعظم محمد شہباز شریف مہربانی کرتے اے میڈیکل کالج اساکوں ݙتا تاں انہاں ہی ہسپتال دا ناں خواجہ محمد صفدر میڈیکل کالج رکھیا، شہر دی آبادی تے ضرورتاں سانڳے ہسپتال ناکافی اے، نویں ہسپتال سانڳے وزیراعلیٰ پنجاب مریم نواز شریف توں درخواست کریسوں۔ انہاں آکھیے چوکاں اچ ڈاکٹراں دے لڳیے اشتہارات میڈیکل پروفیشن دی حرمت دے برعکس ہن، ڈاکٹرز دے اشتہارات سانڳے کوڈ ہووݨا چاہیدے۔ انہاں آکھیے ڈاکٹرز دے ہتھاں اچ شفا ہی ایندا ساریں توں وݙا اشتہار اے۔ انہاں آکھیے سرکاری ہسپتال دے سامݨے نجی ہسپتالاں دا ہجوم میݙے خیال اچ اسٹینڈرڈ پورا نی کریندے پئے ایں کوں بند تھیوݨا چاہیدے ۔ خواجہ محمد آصف آکھیے نواں ہسپتال بݨاوݨ میݙی ذمہ واری اے ۔ انہاں آکھیے مقامی بزنس کمیونٹی جیڑھے کم کیتن او ݙوجھے شہراں دے لوک سوچ نی سڳدے ، اے کمرشل لیول دی ہسپتال فیسلٹی بݨاون میں رلے تھیساں ، انہاں آکھیے سیاست توں ساݙا ݙو نسلاں دا تعلق اے، کوشش اے شہر کوں ہر لحاظ نال خود کفیل بݨاؤں، موٹر وے سیالکوٹ توں کھاریاں تئیں وختی فعال تھی ویسی ۔ انہاں آکھیے ساݙا جغرافیہ 1971 ء اچ بدل ڳیا تے نصاب 80 دے ݙھاکے اچ بدالیا ڳیا ،نصاب اچ کجھ ایجھیاں ڳالھیں رلائیاں ڳئن جنہاں دا حقیقت توں کوئی تعلق کائنی، جݙاں تئیں تعلیم عام نہ تھیسی ، مسئلے حل نہ تھیسن۔
