باکو۔24فروری(اے پی پی)وزیراعظم محمد شہباز شریف آکھیے جو پاکستان اتے آذربائیجان وچال کاروباری سرگرمیاں نال معیشت تکڑی تھیسی، دفاعی تعلقات ودھیسوں۔ اے ڳالھ انہاں پاکستان آذربائیجان بزنس فورم نال خطاب اچ آکھی۔ ایں موقع تے آذربائیجان دے صدر الہام علیوف وی موجود ہن۔ وزیراعظم محمد شہباز شریف آکھیا جو ݙوہاں ملکاں وچال اخلاص، باہمی اعتماد، احترام اتے عوامی سطح تے روابط اتے مھبت دا جذبہ اے، آذری قیادت نال مختلف شعبیاں اچ تعمیری ڳالھ مہاڑ تھئی اے اتے اساں رل تے اڳو تے ودھݨ تے اتفاق کیتے، ساݙی ݙوطرفہ تجارت 14 ملین ڈالر اے ڄیکوں تیکھے 2 ارب ڈالر تئیں پچیسوں جیندے کیتے مختلف معاہداں کوں ہک مہینے اچ حتمی شکل ݙتی ویسی، پاکستان توں باسمتی چاول برآمد کیتے ویسن، ڳھٹ ٹیرف آلے شعبیاں اچ تعاون تے غور کیتا ویسی جو درآمدات برآمدات ودھن، تجارتی اشیاء دے تبادلے نال 2 ارب ڈالر تجارتی ہدف پورا تھی سڳدے، انہاں معاہدیاں تے اپریل اچ پاکستان اچ دستخط کیتے ویسن، باہمی تجارتی سرگرمیاں اچ مسلیاں دے حل کیتے ہک مستقل انفارمیشن بیورو ٻݨایا ویسی۔ انہاں آکھیا جو ݙوہاں ملکاں وچال دفاعی شعبہ اچ تعاون ودھایا ویسی اتے مشترکہ ڈیفنس مینو فیکچرنگ فیسیلٹی ٻݨاوݨ دا فیصلہ تھئے، قابل بھروسہ، سستی ٹرانسپورٹیشن اتے روابط سانڳے نارتھ سائوتھ کوریڈور اہم اے جیندے تے مفید ڳالھ مہاڑ تھیسی، گوادر پورٹ ساݙی تجارت کیتے ہک گیم چینجر منصوبہ اے، آذربائیجان چیمبر آف کامرس اسلام آباد، لاہور و گوجرانوالہ قائم کیتے، پاکستان چیمبر آف کامرس باکو سودھا آذربائیجان دے مختلف شہراں اچ کم کریندا پئے جیندے نال تجارت ودھاوݨ اچ مدد ملسی۔ انہاں آکھیا جو آذربائیجان، ترکیہ اتے پاکستان وچال مفاہمت ساریاں کیتے اہم اے، آذربائیجان اسلام آباد ماہرین دی ٹیم بھیجی اے ڄیڑھی وفاقی دارالحکومت دی تزئین و آرائش کیتے ودھ تے کم کریندی پئی اے۔
