باکو۔25فروری (اے پی پی) وزیراعظم محمد شہباز شریف منگل کوں آذربائیجان دے دارالحکومت باکو اچ عوامی خدمات دے جدید مرکز’’آسان خدمت‘‘ دا دورہ کیتا اتے عوامی فلاح تے بہبود دی ایں سہولت دے جدید ماڈل دی تعریف کیتی۔ آسان خدمت مرکز آوݨ تے آذربائیجان دے صدر دی زیر نگرانی عوامی خدمت اتے سماجی اختراع دی ریاستی ایجنسی (SAPSSI) دے چیئرمین الوی مہدییف وزیر اعظم دا استقبال کیتا۔ ایں موقع تے وزیراعظم کوں ݙسیا ڳئیا جو آسان خدمت شہریاں دی سوکھ کوں ݙیکھدیں ہوئیں عوام دی خدمت کرݨ اچ آپݨی بہتر کارکردگی پاروں ہک معروف ادارہ ٻݨ ڳئے۔ اے توں شہریاں کوں 400 توں ودھ خدمات ݙتی ویندن جیڑھی جو 30 سرکاری ات ے15 نجی اداریاں ولوں ہکی چھت تلوں مل ویندن۔ وزیر اعظم شہباز شریف “آسان خدمت” دی شکل اچ عوامی خدمات ݙیوݨ دے ایں جدید ماڈل دی تعریف کیتی جئیں ٻئے ملکاں کیتے خدمات دا ہک اعلیٰ معیار قائم کیتے۔ وزیراعظم آکھیا جو اساں اسلام آباد اچ “خدمت مرکز” دی طرز دا ہک پائلٹ پراجیکٹ شروع کرݨ چاہندوں اتے ایں بارے اساں آذربائیجان نال معاہدہ کر تے تساݙے تجربے توں فیدہ چیسوں۔ اساں آسان خدمت دی ہک ٹیم کوں پاکستان دا دورہ کرݨ اتے آپسی تعاون دے موقع ڳولݨ دی دعوت ݙتی اے۔ الوی مہدییف وزیر اعظم کوں ݙسیا جو اے سروسصدر الہام علیوف دا ہک تاریخی کم اے جئیں دا مقصد شہریاں کوں سہولت ݙیوݨ اے۔ وزیر اعظم کوں ݙسیا ڳئیا جو ݙتی ڳئی موبائل آسان خدمت جئیں اچ خصوصی طور ٻݨائی ڳئی بساں اتے ہک ٹرین شامل اے، پہلے توں طے شیڈول تے کم کریندن جو ضروری عوامی خدمات براہ راست مقامی لوکاں تئیں پڄیندن۔ وزیر اعظم صدر الہام علیوف دی بصیرت انگیز قیادت دی تعریف کیتی۔ وزیراعظم خدمت مرکز اچ قائم سٹارٹ اپس دے فروغ کیتے ٻݨیے سنٹر (INNOLAND) دا وی دورہ کیتا۔ نائب وزیر اعظم تے وزیر خارجہ محمد اسحاق ڈار، وزیر تجارت جام کمال خان، وزیر سرمایہ کاری و نجکاری عبدالعلیم خان، وزیر اطلاعات تے نشریات عطاء اللہ تارڑ اتے وزیر اعظم دے معاون خصوصی سید طارق فاطمی وی وزیراعظم دے نال ہن۔
