تاشقند۔25فروری(اے پی پی) وزیراعظم محمد شہباز شریف ازبکستان دے صدر شوکت مرزیایوف دی خصوصی دعوت تے 2 ݙینھ دے دورے تے تاشقند پُڄ ڳئن ۔ازبکستان دے وزیراعظم عبداللہ عاریپوف، ازبک وزیرِ خارجہ بختیار سیدوف، تاشقند دے میئر شوکت عمرزاکوف، ازبکستان دے پاکستان اچ سفیر علی شیر تختائیف اتے پاکستان دے ازبکستان اچ سفیر احمد فاروق سودھے اعلیٰ سفارتی و سرکاری اہلکاراں وزیراعظم دا استقبال کیتے۔ وزیراعظم تاشقند اچ یادگار ِآزادی دا دورہ کریسن جتھاں وزیراعظم پُھلاں دی چادر چڑھا تے ازبکستان دی عظیم تاریخی شخصیات کوں خراج عقیدت اتے ازبکستان دی تعمیر و ترقی، غیور و محنتی ازبک عوام سانڳے نیک خواہشات دا اظہار کریسن ۔ وزیراعظم کوں ایں موقع تے یادگار تے تعمیر کیتی ڳئی ازبکستان دی 3000 سالہ تاریخ دی منبت کاری دا دورہ کرایا ویسی تے بریفنگ ݙتی ویسی ۔ وزیراعظم دورے اچ ازبک صدر شوکت مرزیایوف نال ملاقات وی کریسن جئیں اچ ازبکستان تے پاکستان وچال علاقائی رابطے ، تجارت، سرمایہ کاری، توانائی، دفاع، سلامتی، علاقائی استحکام اتے تعلیم دے شعبیں اچ تعاون ودھاوݨ تے ڳالھ مُہاڑ تھیسی ۔ ݙوہیں رہنماواں وچال سانجھی دلچسپی دے عالمی و علاقائی امور تے ڳالھ مُہاڑ وی تھیسی ۔ ملاقات دے بعد پاکستان تے ازبکستان وچال ݙوپاسے تعاون دی مفاہمتی یادداشتاں تے معاہدیں تے وی دستخط تھیسن ۔ پاکستان تے ازبکستان دی کاروباری و سرمایہ کار برادری وچال تعاون ودھاوݨ سانڳے تاشقند اچ پاکستان تے ازبکستان بزنس فورم وی تھیسی جیں اچ وزیراعظم شرکت کریسن تے خطاب وی کریسن۔ وزیرِ اعظم ازبکستان دی تعمیری صنعت دے مشاہدے سانڳے تاشقند اچ بݨائے ڳئے ٹیکنو-پارک دا دورہ وی کریسن ۔ نائب وزیراعظم و وزیرِ خارجہ محمد اسحاق ڈار، وزیرِ تجارت جام کمال خان، وزیرِ سرمایہ کاری و نجکاری عبدالعلیم خان، وزیرِ اطلاعات و نشریات عطاء اللہ تارڑ اتے معاون خصوصی طارق فاطمی وزیرِ اعظم دے دورہ ازبکستان اچ پاکستانی وفد اچ شامل ہن۔
