تاشقند۔26فروری (اے پی پی) پاکستان اتے ازبکستان دفاع، ٹیکنالوجی، تکنیکی تربیت، میڈیا اتے نینگراں کوں بااختیار ٻݨاوݨ دے شعبیاں اچ ݙوپاسہ تعاون کوں مضبوط ٻݨاوݨ کیتے کئی معاہدے اتے مفاہمت دی یادداشتاں تے دستخط کیتے۔ بدھ کوں انہاں دستاویزات تے وزیراعظم شہباز شریف دے ݙو روزہ دورہ ازبکستان بارے شوکت مرزا یوف دی دعوت تے دستخط کیتے ڳئے۔ ݙوہیں رہنماواں دی ݙوپاسہ ملاقات اتے وفود دی سطح تے تھیوݨ آلی ڳالھ مہاڑ دے بعد وزیراعظم شہباز اتے صدر شوکت مرزایوف دستخط دی تقریب اچ شرکت کیتی جڈانجو ݙوہیں پاسوں دے حکام مختلف شعبیاں اچ تعاون دے معاہدے اتے مفاہمت دی یادداشتاں دی پہلے توں دستخط شدہ دستاویزات دا تبادلہ کیتا۔ نائب وزیراعظم تے وزیر خارجہ سینیٹر محمد اسحاق ڈار اتے ازبک وزیر خارجہ بختیار سیدوف سفارتی پاسپورٹ رکھݨ آلیاں کیتے ویزہ فری سفر، ملٹری انٹیلی جنس، داخلی امور، پیشہ ورانہ اتے تکنیکی تربیت اتے سفارت کاراں دی تربیت دے شعبیاں اچ معاہدیاں دی دستاویزات دا تبادلہ کیتا۔سائنسی تحقیق، ٹیکنالوجی اتے اختراع دے شعبیاں اچ تعاون کیتے ݙوہیں فریقاں وچال ہک ٻئے بین الحکومتی معاہدے تے دستخط کیتے ڳئے۔ وزیر تجارت جام کمال خان اتے ازبک نائب وزیر اعظم خدجایف جمشید دستاویزات دا تبادلہ کیتا۔ وزیر اطلاعات تے نشریات عطاء اللہ تارڑ اتے ازبکستان دی نیشنل انفارمیشن ایجنسی دے ڈائریکٹر جنرل کوچیموف عبدالسعید ݙوہیں ملکاں وچال خبراں دے شعبے اچ تعان کیتے ایسوسی ایٹڈ پریس آف پاکستان (اے پی پی) اتے ازبک اطلاعات ایجنسی (یو زیڈ اے) وچال تعاون دے معاہدے دی دستاویز دا تبادلہ کیتا۔ نائب وزیراعظم اسحاق ڈار اتے تاشقند دے میئر شوکت عمر زاکوف برانووچ لاہور اتے تاشقند وچال مفاہمت دی دستاویزات دا تبادلہ کیتا۔ وزیراطلاعات و نشریات عطاء اللہ تارڑ اتے ازبکستان دی یوتھ افیئر ایجنسی دے ڈائریکٹر سعد اللائیف علیشیر وزیراعظم یوتھ پروگرام اتے ازبکستان دی حکومت وچال نینگراں دے معاملیاں بارے ایم او یو دی دستاویزات دا تبادلہ تھیا۔ بعد اچ وزیر اعظم شہباز شریف اتے صدر سابق وزیر اعظم دے دورے دے نتائج اتے اعلیٰ سطحی سٹریٹجک تعاون کونسل دے قیام دے پروٹوکول بارے سانجھے اعلامیہ تے دستخط کیتے۔
