تاشقند ۔26فروری (اے پی پی) پاکستان اتے ازبکستان خوشحالی اتے ترقی دا عزم کریندیں ہوئیں مستقبل قریب اچ ݙوپاسہ تجارت دے حجم کوں اڄوکے 400 ملین ڈالر توں ݙو ارب دالر تئیں ودھاوݨ، تجارت، معیشت ، سیاحت اتے ٻئے شعبیاں اچ تعاون کوں ودھاوݨ تے اتفاق کیتے۔ وزیراعظم محمد شہباز شریف آکھیا جو ازبکستان پاکستان دا بااعتماد سانجھے دار اے۔ تجارت، سرمایہ اتے تجارت اچ ودھارا ݙوہیں ملکاں دے فیدے اچ اے۔ ٹرانس افغان ریلوے منصوبہ پورے خطے کیتے گیم چینجز ثابت تھیسی۔ افغانستان اچ امن تے استحکام خطے دے فیدے اچ اے۔ افغانستان دی سرزمین پاکستان سودھے کہیں ٻئے ملک تے حملے کیتے استعمال نی تھیوݨی چاہیدی۔ پاکستان غزہ دے مظلوم عوام دی حمایت کریندا رہسی جڈانجو ازبکستان دے صدر شوکت مرزایوف آکھیا جو عالمی چیلنجز دے باوجود ݙوہیں ملکاں وچال روشن مستقبل کیتے معاہدے ٻہوں اہم ہن۔ اے ڳالھیں انہاں بدھ کوں پاکستان اتےازبکستان وچال مختلف شعبیاں اچ تعاون دے معاہدے اتے مفاہمت دی یاداشتاں تے دستخطاں دے بعد سانجھی پریس کانفرنس توں خطاب کریندیں ہوئیں آکھی۔ وزیراعظم محمد شہباز شریف آکھیا جو بہترین میزبانی تے ازبکستان دے صدر شوکت مرزایوف دا شکریہ ادا کرینداں۔ پاکستان اتے ازبکستان دے تعلقات صدیاں تے محیط ہن اتے اساݙے تعلقات دی ہک تاریخ اے۔ ظہیر الدین بابر ، امیر تیمور اتے سمرقند اتے بخارا نال اساݙا پراݨا تعلق اے۔ انہاں آکھیا جو صدر شوکت مرزایوف نال ون آن ون ملاقات اتے وفود دی سطح تے ڳالھ مہاڑ اچ انہاں ولوں جیڑھے جذبات دا اظہار کیتا ڳئے اونکوں ہمیشہ یاد رکھیا ویسی۔ اساݙی خواہش اے جو ݙوہیں ملکاں وچال تعلقات کوں ٻیا استحکام ملے اتے ترقی اتے خوشحالی دی منزل آلے پاسے ودھن۔ وزیراعظم آکھیا جو صدر شوکت مرزایوف آپݨے ملک کوں بدل تے رکھ ݙتے۔ صدر مرزایوف ازبکستان کوں ترقی دی نویں راہ تے پڄائے۔ میں پاکستان دی معاشی ترقی کیتے پرعزم ہم، ہک سال اچ اساݙی معیشت ترقی کیتی اے، افراط زر دی شرح 38 فیصد توں ڳھٹ تے 2.4 فیصد تے آڳئی اے۔ شرح سود جو ہک سال پہلے باوی فیصد ہئی ہݨ ڳھٹ تھی تے 12 فیصد تے آڳئی اے۔ وزیراعظم آکھیا جو پاکستان دی آئی ٹی دی برآمدات اتے کاروباری سرگرمیاں ودھدی پئن۔ ہک سال اچ پاکستان دی معیشت کوں آپݨے پیراں تے کھڑائے۔ وزیراعظم آکھیا جو ݙوہیں ملکاں وچال مختلف شعبیاں اچ تعاون دی دستاویزات تے دستخط کیتے ڳئن۔ ٹرانس افغان ریلوے رابطے دا مقصد حاصل کریسوں۔ اے صرف پاکستان اتے ازبکستان کیتے نئی پورے خطے کیتے گیم چینجر مںصوبہ ہوسی۔ وزیراعظم آکھیا جو پاکستان اتے ازبکستان معدنیات اتے کان کنی دے شعبے اچ تعاون کوں ودھاوݨ اتے ہک ٻئے دے اقتصادی زونز اچ سرمایہ کاری تے وی اتفاق کیتے۔ پاکستان اتے ازبکستان خوشحالی اتے ترقی دا عزم کریندیں ہوئیں مستقبل قریب اچ ݙوپاسہ تجارت دے حجم کوں اڄوکے 400 ملین ڈالر توں ݙو ارب دالر تئیں ودھاوݨ، تجارت، معیشت ، سیاحت اتے ٻئے شعبیاں اچ تعاون کوں ودھاوݨ تے اتفاق کیتے۔انہاں آکھیاجو پاکستان ازبکستان دی تجارت دے عالمی ادارے اچ جلدی شمولیت چاہندے۔ وزیراعظم آکھیا جو ہک پرامن اتے مستحکم افغانستان علاقائی رابطے اتے علاقے اچ امن اتے ترقی کیتے ضروری اے۔ افغانستان اچ امن و استحکام خطے دے فیدے اچ اے۔ ازبکستان دے سرمایہ کاراں کوں پاکستان دے دورے دی دعوت ݙینداں۔ انہاں آکھیا جو پاکستان غزہ دے مظلوم عوام دی حمایت جاری رکھیسی۔ ازبکستان دے صدر شوکت مرزایوف آکھیا جو وزیراعظم شہباز شریف کوں ازبکستان دے دورے تے خوش آمدید آکھدوں۔ اساݙی ملاقات فیدہ مند رہی اے، ݙوہیں ملکاں وچال مختلف شعبیاں اچ تعاون ودھاوݨ تے ڳالھ کیتی ڳئی اے۔ پاکستان اساݙا بااعتماد سانجھے دار اے۔ ݙوہیں ملکاں دے تعلقات مضبوط تھیندے پئن۔ چیلنجز نال نبڑݨ کیتے سانجھے لائحہ عمل اتے موقعیاں توں فیدہ چاتا ویسی۔ اساں ݙوپاسہ تجارتی حجم کوں ودھا تے ݙو ارب ڈالر تئیں ڳھن ویسوں۔ انہاں آکھیا جو ݙوہیں ملکاں وچال بین الحکومتی کمیشن موثر طریقے نال کم کریندا پئے۔ تاشقند اتے لاہور وچال باقاعدہ پروازاں ݙوہیں ملکاں کیتے فیدہ مند ہن۔ پاکستان دی کمپنیاں کوں ازبکستان اچ سرمایہ کاری بارے آکھسوں۔ انہاں آکھیا جو وزیراعظم شہباز شریف دا دورہ تاریخی اہمیت رکھیندے۔ انہاں آکھیا جو ݙوہیں ملکاں وچال اعلی سطحی سٹریٹجک کونسل کوں فعال ٻݨایا ویسی، فارماسیوٹیکل، ٹیکسٹائل، چمڑے دی صنعت، زراعت اتے ٻئے شعبیاں اچ تعاون ودھیسوں۔ انہاں آکھیا جو افغانستان دی سماجی ترقی اتے مسئلہ فلسطین کیتے سفارتی اتے منصفانہ حل کیتے کوششاں کیتی ویسن، ٹرانس افغان ریلوے پراجیکٹ تے وی تفصیلی ڳالھ تھئی اے۔ دفاع دے شعبے اچ وی تعاون ودھایا ویسی۔ انہاں آکھیا جو افغانستان دا ہک وفد دی ازبکستان دا دورہ کریندا پئے جئیں نال ڳالھ مہاڑ اچ مسئلے اتے معاملیاں تے ڳالھ کیتی ویسی۔ انہاں آکھیا جو امام بخاری، امام ترمذی، بہائوالدین نقشبندی اتے ظہیر الدین بابر اساں کیتے قابل قدر اتے روحانہ ورثہ چھوڑیے۔ انہاں آکھیا جو بخارا، سمرقند اتے پاکستان دے مختلف شہراں نال سیاحت ودھائی ویسی۔ وزیراعظم شہباز شریف میکوں سوھݨی اتے بے مثال سرزمین پاکستان دے دورے دی دعوت ݙتی اے، میں انہاں دے دورے دی دعوت قبول کرینداں۔ انہاں رمضان المبارک دے بابرکت مہینے دے آوݨ تے وی مبارخ ݙتی۔ انہاں آکھیا جو ݙوپاسہ تعلقات اتے سرمایہ کاری ویلھے دا تقاضا اے۔ وزیراعظم شہباز شریف دے جذبہ خیر سگالی تے انہاں دے دلوں شکریہ ادا کرینداں۔
