تاشقند۔26فروری(اے پی پی) وزیراعظم محمد شہباز شریف تےازبکستان دے صدر شوکت مرزایوف ݙوہیں ملکاں وچال تجارت، سیاحت، توانائی، علاقائی رابطے و ثقافتی تعلقات دے ودھارے تے آندے چار سال اچ ݙوپاسے تجارتی حجم 2 ارب ڈالر تے پڄاوݨ تے اتفاق کریندے ازبکستان-افغانستان-پاکستان ریلوے منصوبے تے عمل درآمد دا عزم کیتے ۔ وزیراعظم دفتر میڈیا ونگ توں جاری بیان موجب وزیراعظم محمد شہباز شریف تے ازبک صدر شوکت مرزایوف وچال تاشقند اچ ملاقات تھئی ۔ ملاقات اچ ݙوہیں ملکاں وچال سانجھے تعاون بالخصوص تجارت، سیاحت، توانائی، علاقائی رابطے تے ثقافتی تعلقات مزید ودھاوݨ تے ڳالھ مہاڑ تھئی ۔ ملاقات اچ دونوں رہنماواں پاکستان تے ازبکستان وچال سفارتی تعلقات دے 33 سال اچ سانجھے تعاون تے پیشرفت تے اطمینان کیتے ۔ ݙوہیں رہنماواں آندے چار سال اچ پاکستان تے ازبکستان وچال تجارت دے حجم کوں 2 ارب ڈالر تے پڄاوݨ ، ٹرانزٹ ٹریڈ ایگریمنٹ (2021)، ترجیحی تجارتی معاہدے (2023) تے موثر عملدرآمد، ݙوہیں ملکاں دے خصوصی اقتصادی زونز اچ سرمایہ کاری تے پاکستان و ازبکستان دی کاروباری برادری وچال تعاون دے ودھارے تے اتفاق کیتے ۔ ݙوہیں رہنماواں خطے اچ تجارت و علاقائی رابطے دے ودھارے سانڳے ازبکستان-افغانستان-پاکستان ریلوے منصوبے دی کلیدی اہمیت تے اتفاق کیتے تے ݙوہیں ملکاں دے ایں منصوبے تے عمل درآمد دے عزم دا اعادہ کیتے۔ ملاقات اچ پاکستان تے ازبکستان وچال سیاحت دے ودھارے بالخصوص ترمیز، بخارا، لاہور اتے کراچی وچال ایں حوالے نال تعاون تے ڳالھ مہاڑ تھئی ۔ عالمی و علاقائی امور تے آپݨی سانجھی ڳالھ کریندے ݙوہیں رہنماواں بین الاقوامی مسئلیں دے حل سانڳے عالمی تنظیماں بالخصوص اقوام متحدہ دے کردار کوں پائیدار ترقی اتے عالمی سطح تے امن و سلامتی گھنݨ سانڳے ودھارا ݙیوݨ دی اہمیت تے زور ݙتے ۔ وزیراعظم محمد شہباز شریف ملاقات اچ پاکستان تے ازبکستان وچال تاریخی اتے ثقافتی رشتےکوں مزید مستحکم کرݨ تے زور ݙتے۔ انہاں آکھیے ݙوہیں ملکاں وچال تجارتی تے معاشی تعاون ودھاوݨ سانڳے نویں رستے کھولݨ دی لوڑھ اے ۔ وزیراعظم پاکستان ولوں علاقائی رابطے دے شعبے اچ سانجھے منصوبیں تے توجہ ݙیوݨ دا عزم کیتے ۔ وزیراعظم شہباز شریف پاکستان اتے ازبکستان وچال تکڑی شراکت داری کوں ݙوہیں ملکاں تے پورے خطے دی ترقی تے خوشحالی سانڳے فیدہ مند قرار ݙتے ۔ازبکستان دے صدر شوکت مرزا یوف پاکستان نال تعلقات کوں مزید تکڑا بݨاوݨ دی خواہش ظاہر کیتی ۔ ازبک صدر آکھیے خطے اچ استحکام تے ترقی سانڳے ݙوہیں ملکاں دا سانجھا تعاون ٻہوں اہمیت رکھیندے ۔ صدر مرزا یوف پاکستان اچ حکومت دی معاشی استحکام اتے ملکی ترقی دے اقدامات دی تعریف کریندے آکھیے ازبکستان پاکستان نال تجارتی تے اقتصادی شراکت داری کوں اُتے گھن ونڄݨ سانڳے پرعزم اے ۔ وزیراعظم شہباز شریف تے صدر مرزا یوف دی ملاقات دے بعد ݙوہیں ملکاں دے وفد وچال اعلیٰ سطحی ملاقات تھئی ۔ ملاقات اچ نائب وزیراعظم و وزیر خارجہ محمد اسحاق ڈار، وزیر تجارت جام کمال خان، وزیر سرمایہ کاری و نجکاری عبدالعلیم خان، وفاقی وزیر اطلاعات و نشریات عطاء اللہ تارڑ اتے معاون خصوصی طارق فاطمی وی شامل ہن۔ملاقات اچ پاکستان اتے ازبکستان دی طرفوں تجارت، سیاحت، توانائی، تعلیم، ثقافت، علاقائی رابطے تے دفاعی شعبیں اچ تعاون کوں مزید تکڑا کرݨ دے حوالے نال موجود استعداد تے تفصیلی ڳالھ مہاڑ کیتی ڳئی ۔ ݙوہیں ملکاں دے وفد مشترکہ مفادات گھنݨ سانڳے عملی اقدامات تے زور ݙتے۔
