اسلام آباد۔26فروری (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے اے ھک حقیقت اے جو کوئی وی قوم ھک ݙھاکے دے سیاسی استحکام دے بغیر ترقی یافتہ ملک دا درجہ نی گھن سڳدی، قومی ترقی و خوشحالی سانڳے چار بنیادی ستون ہن جنہاں اچ امن، سیاسی استحکام، پالیسیاں دا تسلسل اتے مسلسل اصلاحاتی ایجنڈا شامل ہن، اے چار عناصر تے مبنی ھک تکڑا نظام قومی ترقی تے خوشحالی سانڳے ناگزیر اے۔اے ڳالھ انہاں پاکستان انسٹی ٹیوٹ آف ڈویلپمنٹ اکنامکس (پی آئی ڈی ای) راستہ مقابلہ جاتی گرانٹ پروگرام دے تحت ݙو ݙینھ وار سیمینار توں خطاب اچ آکھی ۔ پروفیسر احسن اقبال قومی ترقی دے اہداف اڳوں ودھاوݨ خصوصاً برآمدات کوں 30 ارب ڈالر توں 100 ارب ڈالر تئیں ودھاوݨ سانڳے قابلِ رسائی ڈیٹا، شواہد تے مبنی تحقیق تے پالیسیاں دی لوڑھ تے زور ݙیندے آکھیے جو پاکستان دا ساریں توں وݙا چیلنج اے ہے جو اساں کتنی تکھے آپݨی برآمدات ودھا سڳدوں اے ساݙی ترقی دا تعین کریسی جو اساں 100 ارب ڈالر دے برآمدی ہدف کوں کتنی جلدی گھن سڳدوں ۔ ایں سانڳے اساکوں30-40 ڈگری دی بجائے 80-90 ڈگری دی نمایاں تبدیلی دی لوڑھ اے جیڑھا جو ڈیٹا اتے شواہد تے مبنی رہنمائی نال ممکن تھیسی ݙو ݙینھ وار سیمینار اچ پالیسی تحقیق اتے ترقیاتی حکمت عملیاں تے توجہ ݙتی ڳئی ایں دوران چھی تکنیکی سیشنز اچ 24 تحقیقی مقالے پیش کیتے ویندے پئن ۔کانفرنس اچ “مقابلہ تے ترقی سانڳے ٹیکنالوجی”، “مالیاتی نظم و نسق”، “ترقی اتے سستی”، “انسانی سرمائے اتے مواقع”، “پائیدار ترقی” اتے “سیاسی طرزِ حکمرانی” جیھے موضوعات تے ڳالھ مہاڑ کیتی ڳئی۔
