اسلام آباد۔26فروری(اے پی پی)پاکستان اتے ازبکستان تجارتی و اقتصادی تعلقات، صنعتی تعاون ودھاوݨ، ٹرانزٹ ٹریڈ ایگریمنٹ دے نفاذ اتے باہمی تجارتی حجم 2 ارب ڈالر تئیں ودھاوݨ دا عزم کیتے۔ وزیر اعظم محمد شہباز شریف ݙو ݙینھ دا دورہ ازبکستان مکمل کیتے اتے ایں توں پہلے ازبکستان دے صدر شوکت مرزایوف نال مشترکہ پریس کانفرنس کیتی اتے مشترکہ اعلامیہ جاری کیتے۔
انہاں موجودہ صورتحال اتے مختلف شعبیاں اچ ݙوطرفہ تعاون دے امکانات، علاقائی و بین الاقوامی اہمیت تے الیندے جمہوریہ ازبکستان اتے اسلامی جمہوریہ پاکستان وچال سفارتی تعلقات دے قیام دے بعد 33 سالاں اچ ودھݨ آلے اعلیٰ سطح باہمی تعاون دی تعریف کیتی۔ ݙوہیں رہنماواں خطے اچ آپسی بنیادی مفادات اتے امن و استحکام سانڳے باہمی تعلقات ٻعے تکڑے کرݨ اتے تعاون نویں سطح تئیں ودھاوݨ دا عزم کیتے۔ اعلامیہ دے مطابق ݙوہاں رہنماواں باہمی تعلقات دی نوعیت تے اعتماد کیتے جو باہمی سٹریٹجک شراکت داری دے قیام بارے مشترکہ اعلامیہ تے 16 جولائی 2021ء اتے 4 مارچ 2022ء کوں دستخط کیتے ڳن، آکھیا ڳئے جو ݙوہیں ملک دوستی، مساوات و باہمی احترام دے اقدار نال سٹریٹجک شراکت داری ودھیندے راہسن، فریقین ہک ٻئے دی خودمختاری، آزادی و علاقائی سالمیت دی حمایت دے نال نال ݙوہیں ریاستاں دے عوام دے طویل مدتی قومی مفادات سانڳے پائیدار ترقی ودھاوݨ کیتے جامع تعاون دا عزم وی دوہرائے۔ انہاں باقاعدہ سیاسی مذاکرات اچ پیشرفت اتے توسیع بشمول رسمی و غیر رسمی سربراہی اجلاساں دی شکل اچ اپݨی حمایت دا یقین ݙیوائے۔ بین الپارلیمانی روابط، سیاسی، اقتصادی، ثقافتی و انسانی ہمدردی دے تعاون دی صلاحیت ودھاوݨس ودھا ݙوہاں ملکاں دے عوام وچال سنڳت اتے روابط تکڑے کرݨ تے زور ݙیندے 3-4 نومبر 2024 کوں تاشقند اچ تھیوݨ آلے جمہوریہ ازبکستان اتے اسلامی جمہوریہ پاکستان وچال تجارتی-اقتصادی و سائنسی-تکنیکی تعاون تے مشترکہ بین الحکومتی کمیشن دے 9ویں اجلاس دے نتائج اڳونہے کیتن۔ انہاں آندے 4 سالاں اچ باہمی تجارتی حجم 2 ارب ڈالر تئیں ودھاوݨ، ہک ٻئے دے خصوصی اقتصادی زونز اچ سرمایہ کاری دی حوصلہ افزائی، سہولت کاری اتے بی ٹو بی تعاون ودھاوݨ تے اتفاق کیتے۔ انہاں آکھیا جو ازبکستان-افغانستان-پاکستان کوریڈور پورے خطے کیتے ودھ موثر اتے اقتصادی تجارتی رستہ اے، ایں روٹ تے کارگو ٹرانسپورٹیشن دے ودھدا حجم بہترین اے، ایں سانڳے ازبکستان-افغانستان-پاکستان (یو اے پی) ریلوے پروجیکٹ کوں اقو تے ٹوریا ویسی۔ انہاں ٹرانسپورٹ روٹس دے استعمال کوں ودھاوݨ کیتے ازبکستان-افغانستان-پاکستان ملٹی ماڈل ٹرانسپورٹ کوریڈور دی ترقی سودھا ٹرانسپورٹ خدمات کیتے باہمی تعاون تے زور ݙتے۔ فریقین ازبکستان-افغانستان-پاکستان (مزار شریف تا خرلاچی) ریلوے منصوبے تے عمل درآمد کیتے اتفاق کیتے جو ݙوہیں ملک بین الاقوامی میدان اچ تعاون ودھیندے ہوئے امن اقدامات سانڳے تعاون کریسن۔ فریقین ݙوہاں ملکاں وچال اقوام متحدہ اتے ایندے خصوصی اداریاں، اسلامی تعاون دی تنظیم، اقتصادی تعاون تنظیم، شنگھائی تعاون تنظیم، غیروابستہ تحریک اتے ٻئے بین الاقوامی و علاقائی ڈھانچے دا فریم ورک تکڑا کرݨ تے اتفاق کیتے۔ انہاں بین الاقوامی اداریاں اچ مختلف عہدیاں کیتے ہک ݙوڄھے دے امیدواراں تے غور، بین الاقوامی قانون برقرار رکھݨ اتے تعاون تے کٹھیاں کوششاں تے اور ݙتے۔ فریقین زور ݙتے جو افغانستان کوں پرامن اتے خوشحال ریاست اچ تبدیل کرݨ کیتے کوشاں کرݨیاں ہوسن جیڑھیاں دہشت گرد گروہاں دا موثر مقابلہ کرن اتے کہین وی ملک خاص کر ایندے ہمسایاں کوں لاحق خطرات روکن۔ انہاں اتفاق کیتے جو اقوام متحدہ دی جنرل اسمبلی اتے سلامتی کونسل دی قرارداداں دے مطابق مسلیاں دا پرامن حل وسطی و جنوبی ایشیا اتے ایندے ٻاھرو ترقی و خوشحالی دا باعث ٻݨسی۔ فریقین فلسطینی عوام دے حق خود ارادیت کیتے انہاں دی منصفانہ جدوجہد دے نال نال 1967ء توں پہلے دیاں سرحداں آلی ہک خودمختار و متصل فلسطینی ریاست دے قیام کیتے اپݨی حمایت ݙتی۔ انہاں بین المذاہب، ثقافتی و بین النسلی ہم آہنگی، باہمی احترام و مذہبی رواداری ودھاوݨ، اسلامو فوبیا دا مقابلہ کرݨ کیتے عالمی کوششاں دی حمایت اتے مسلم ملکاںو چال یکجہتی ودھاوݨ تے اتفاق کیتے۔ اعلامیہ موجب وزیر اعظم شہباز شریف ازبکستان دے صدر شوکت مرزایوف اتے عوام دی مہمان نوازی تے شکریہ ادا کیتے اتے ازبکستان دے رہنما کوں جامع تعاون ٻیا ودھاوݨ کیتے تیکھے پاکستان دا دورہ کرݨ دی دعوت ݙتی جیڑھی انہاں قبول کیتی اے، ایں دورے دی تاریخ تے سفارتی ذرائع نال اتفاق کیتا ویسی۔
