تاشقند۔26فروری(اے پی پی)وزیراعظم محمدشہبازشریف ٹرانس افغان ریلوے پراجیکٹ کوں گیم چینجر منصوبہ قرار ݙیندے آکھیے جو پاکستان منصوبہ تے عملدرآمد کیتے پرعزم اے، ݙوہاں ملکاں وچال توانائی، کان کنی، معدنیات، ٹیکسٹائل،آئی ٹی و سیاحت اچ ودھاوݨ دی وݙی صلاحیت اے، ݙوہیں ملکاں دے تاجر مشترکہ منصوبیاں نال باہمی تجارت ودھاوݨ کیتے کردار ادا کرن۔ تاشقند اچ پاکستان ازبکستان بزنس فورم نال خطاب کریندے وزیراعظم شہبازشریف آکھیے جو بزنس فورم تھیوݨ نال ݙوہاں ملکاں وچال باہمی تجارت و سرمایہ کاری وھدسی اتے ہک ٻئے دے تجربیاں توں فیدہ چاوݨ اچ مدد ملسی، ازبکستان دے صدر سارے شعبیاں اچ باہمی استفادہ کیتے ہتھ ونݙاوݨ دا یقین ݙیوائے، بزنس فورم مشترکہ اہداف سانڳے ٻہوں اہم اے، اے صنعت کاری، تجارت و سرمایہ کاری ودھاوݨ کیتے ہک وݙے عزم دی شروعات اے، ایں سانڳے ازبکستان دے صدر نال باہمی تعاون دے مواقع تے الائے، ساݙی تجارت و سرمایہ کاری، بزنس ٹو بزنس معاہدیاں، 7 ارب ڈالر دے سرمایہ کاری منصوبے ٹرانس افغان ریلویز تے ڳالھ تھئی اے جیندے نال افغانستان دے رستے ازبکستان توں پاکستان تئیں راہدی نکلݨ نال پورے خطہ اچ تجارت دی شکل وی وٹیج ویسی، کوشش اے جو منصوبی مکمل کرݨ کیتے تیکھے کم کروں، ایں سانڳے اہم پیش رفت تھئی اے، کان کنی، معدنیاں، صنعت و تجارت سودھا توانائی دے شعبہ تے ودھ توجہ اے، متبادل توانائی ذرائع تے الائے جو ازبکستان اچ ہوا اتے سورج نال ہزاراں میگاواٹ متبادل توانائی دی پیداوار توں فیدہ چاتا ونڄ سڳدے، پاکستان اچ وی سورج اتے ہوا نال بجلی دی پیداوار دی وݙی صلاحیت اے، پاکستان اتے ازبکستان اچ خصوصی اقتصادی زونز وی اہم شعبہ اے، ٹیکسٹائل وینچرز دی فعالیت اتے جدید مینجمنٹ و ٹیکنالوجی دی لوڑھ اے، ایویں لیدر،فارما اتے سرجیکل آلات اچ پاکستان دی مہارت فیدہ ݙیسی، ازبکستان پاکستانی بزنس کمیونٹی اتے حکومتی اہلکاراں کوں بغیر دیر دے ویزے ݙیوݨ دا وعدہ کیتے، سیاحت اچ تعاون ودھسیوں، ایندے نال سیاحتی مقامات اچ سرمایہ کاری، بین الاقوامی سیاحواں کوں متوجہ کرݨ اتے آمدن ودھاوݨ اچ مدد ملسی۔ حکومت تاجراں اتے سرمایہ کاراں کوں ودھ سوکھ ݙیندی پئی اے جیندے کیتے ایس آئی ایف سی اہم کردار ادا کریندا پئے، سارے متعلقہ وزارتاں دے نمائندے پاکستان دا دورہ کریسن اتے باہمی تجارت و سرمایہ کاری ودھاوݨ کیتے معاہداں تے عملدرآمد دا جائزہ ڳھنسن، کراچی اتے گوادرپورٹ درآمدات، برآمدات اتے ٹرانزٹ گڈز دے تجارتی مراکز ہوسن، سامان دی نقل وحمل کیتے این ایل سی اپݨے ازبک ہم منصب ادارے نال رل تے مشترکہ کمپنی ٻݨیسی جیڑھی ہک وݙی کامیابی اے۔ وزیراعظم پرتپاک استقبال تے ازبکستان دے صدر اتے عوام دا شکریہ ادا کیتے اتے آکھیے جو پاکستان اتے ازبکستان رل تے اقوام عالم اچ اپݨا کردار ادا کریسن۔ فورم نال ازبکستان دے صدر وی خطاب کیتے۔
