اسلام آباد۔27فروری (اے پی پی) وزیراعظم محمد شہباز شریف ازبکستان دے صدر شوکت مرزیوئیف دی دعوت تے 25 توں 26 فروری تئیں جمہوریہ ازبکستان دا سرکاری دورہ کیتے۔ خمیس کوں دفترخارجہ توں جاری بیان موجب دورے اچ پاکستان اتے ازبکستان وچال تاریخی اتے برادرانہ تعلقات تے زور ݙتا ڳئے اتے ݙوہیں ملکاں دی قیادت آپسی تعاون ودھاوݨ دا عزم کیتے۔ دورے اچ ݙوہیں ملکاں تجارت، رابطے، ثقافت اتے عوامی تبادلے سویں مختلف شعبیاں اچ تعاون کوں بہتر ٻݨاوݨ بارے آپݨے نقطہ نظر دا اشتراک کیتا۔ بیان اچ آکھیا ڳئیا جو ڳالھ مہاڑ اچ امن، استحکام اتے خوشحالی کوں ودھاوݨ دے آپسی مقصد دے مطابق ٹرانس افغان ریلوے اتے تجارتی راہداریاں نال علاقائی رابطیاں کوں اڳوں ودھاوݨ تے زور ݙتا۔ وزیراعظم 25 فروری کوں تاشقند اچ پاکستان-ازبکستان بزنس فورم توں وی خطاب کیتا۔ اے دورہ کئی مفاہمتی یاداشتاں اتے معاہدیاں تے دستخط نال مُک ڳیا۔ وزیراعظم دے دورے دے چھیکڑ تے سانجھا بیان وی جاری کیتا ڳئیا۔
