اسلام آباد۔27فروری(اے پی پی)پاکستان اتے یو اے ای تاریخی و برادرانہ تعلقات ٻئے تکڑے کرݨ دا عزم دوہریندے سیاسی تعلقات باہمی فیدے سانڳے اقتصادی شراکت داری اچ بدلݨ تے اتفاق کیتے۔ اے اتفاق اسلام آباد اچ وزیر اعظم محمد شہباز شریف نال ابوظہبی دے ولی عہد اتے ابوظہبی ایگزیکٹو کونسل دے چیئرمین شیخ خالد بن محمد بن زاید النہیان ملݨ ویلھے کیتے۔
وزیراعظم ابوظہبی دے ولی عہد دا پرتپاک خیرمقدم کیتے۔ ݙو طرفہ ملاقات دے بعد وفود دی سطح تے ڳالھ مہاڑ تھئی۔ ایں مہینے دے شروع اچ ابوظہبی اچ متحدہ عرب امارات دے صدر شیخ محمد بن زاید النہیان نال اپݨی نتیجہ خیز ملاقات دا ݙسیندے وزیر اعظم آکھیا جو ݙوہیں ملک اپݨے بہترین سیاسی تعلقات کوں باہمی طور تے فائدہ مند اقتصادی شراکت داری اچ وٹاوݨ کیتے رل تے کم کریندے پن۔ وزیراعظم آکھیا جو میݙے دورہ ازبکستان اچ ازبکستان-افغانستان- پاکستان ریلوے لائن منصوبے تے الائے اتے ازبکستان وی منصوبے اچ دلچسپی ݙکھائی اے، منصوبے نال گوادر اتے ابوظہبی پورٹس کوں فیدہ تھیسی اتے اے منصوبہ خطے کیتے گیم چینجر ثابت تھیسی۔ وزیراعظم ہر ݙکھ سکھ اچ نال تھیوݨ تے شکریہ ادا کریندے مختلف شعبیاں اچ پاکستان کیتے متحدہ عرب امارات دی مسلسل اتے مضبوط حمایت دی تعریف کیتی۔
پاکستان اچ سرمایہ کاری ودھاوݨ کیتے مختلف پاکستانی اداریاں اتے ابوظہبی پورٹس وچال کامیاب سرمایہ کاری اقدامات اطمینان کیتا ڳئے۔ شیخ خالد بن محمد بن زید جیڑھے سینئر حکام اتے کاروباری رہنماواں دے وفد دے کٹھے ہین، وزیر اعظم دا شکریہ ادا کیتے اتے پاکستان دی اقتصادی ترقی اتے خوشحالی کیتے متحدہ عرب امارات دی مسلسل حمایت دا عزم دوہرائے۔ انہاں متحدہ عرب امارات اتے پاکستان وچال کئی مفاہمت دی یادداشتاں اتے معاہداں دے تبادلاں دا مشاہدہ وی کیتے۔ ݙوہاں ملکاں وچال بینکنگ، کان کنی، ریلویز اتے انفرااسٹرکچر دے شعبیاں اچ تعاون ودھاوݨ کیتے مفاہمتی یادداشتاں اتے معاہداں تے دستخط تھیئن۔
