معاشی ترقی سانڳے بحری تجارت ودھاوݨ ناگزیر اے،  وفاقی وزیر بحری امور دا نیشنل میری ٹائم پالیسی ورکشاپ توں خطاب

اسلام آباد۔28فروری(اے پی پی) وفاقی وزیر بحری امور قیصر احمد شیخ آکھیے پاکستان اچ بحری امور دا شعبہ معاشی ترقی سانڳے کلیدی اہمیت رکھیندے ۔ انہاں ایں ڳالھ تے زور ݙتے تکڑی معاشی ترقی سانڳے بحری تجارت ودھاوݨ ناگزیر اے۔ جمعہ دے ݙینھ تھیوݨ آلی نیشنل میری ٹائم پالیسی ورکشاپ توں خطاب کریندے وفاقی وزیر آکھیے کراچی پورٹ ٹرسٹ (کے پی ٹی )، پورٹ قاسم تے ٻئی بندرگاہواں تے مہارت رکھݨ آلی ٹیم موجود اے جیڑھی جو بحری معیشت کوں مزید مستحکم بݨاوݨ سانڳے کم کریندی پئی اے ۔ انہاں امید ظاہر کیتی جو میری ٹائم سیکٹر مستقبل اچ پاکستان دی معاشی ترقی اچ چنڳاں کردار نبھیسی ۔وزیر بحری امور آلجہء گزریل سال بحری شعبے کوں ارباں روپے دا ضیان تھیا ہئی لیکن اڄوکے سال 100 ارب روپے منافع دا ہدف مقرر کیتا ڳئے جیں سانڳے قوی امید اے ۔انہاں آکھیے 32 ارب روپے دی برآمدات دا ہدف چار سال اچ 60 ارب ڈالر تئیں ودھاوݨ دا منصوبہ اے ۔ انہاں نشاندہی کیتی جو پاکستانی بندرگاہواں اپݨی گنجائش توں 50 فیصد گھٹ کم کریندیاں پئن حالانکہ انھاں اچ بے پناہ صلاحیت موجود اے، جے درآمدات تے برآمدات دا حجم 90 ارب ڈالر اے تاں توقع اے اڳلے چار سالاں اچ اے ݙوگنا تھی ویسی ۔قیصر احمد شیخ آکھیے وسطی ایشیائی ملکاں اچ تجارتی موقع تکھے ودھدے پئن لیکن انھاں کنے آپݨیاں بندرگاہواں کائنی او سانڳے او پاکستان دی بندرگاہواں تے انحصار کریندے پئن ۔ انہاں آکھیے وزیر اعظم شہباز شریف سنٹرل ایشیائی ملکاں دے دورے کریندے پئن تاں جو ایں حوالے نال مزید موقع ڳولیے ونڄ سڳدن۔