اسلام آباد۔28فروری(اے پی پی)وزیراعظم محمد شہباز شریف روس نال سفارتی، تجارتی و سرمایہ کاری روابط ٻئے ودھاوݨ دا عزم دوہریندے آکھیے جو پاکستان اتے روس وچال توانائی اتے ٻئے شعبیاں اچ تعاون ودھایا ویسی۔ اے ڳالھ انہاں اسلام آباد اچ روس دے اول نائب وزیر برائے توانائی پاول سوروکن دی اڳواݨی اچ ملݨ آوݨ آلے 6 رکنی وفد نال الیندے آکھی۔ وزیراعظم آکھیا جو روس دے صدر ولادی میر پیوٹن نال آستانہ اچ شنگھائی تعاون تنظیم سربراہی اجلاس تے چنڳی ملاقات تھئی ہئی۔ انہاں روسی صدر کوں دورہ پاکستان دی دعوت ݙتی۔ روسی اول نائب وزیر توانائی آکھیا جو روس پاکستان نال توانائی دے شعبے اچ تعاون ودھیسی۔ انہاں شاندار میزبانی تے حکومت پاکستان دا شکریہ ادا کیتے۔ ملاقات اچ نائب وزیراعظم و وزیر خارجہ اسحاق ڈار، وفاقی وزیر اقتصادی امور احد خان چیمہ، وفاقی وزیر پٹرولیم مصدق ملک، وفاقی وزیر اطلاعات و نشریات عطاء اللہ تارڑ ، وفاقی وزیر پاور ڈویژن اویس احمد لغاری، وفاقی وزیر علی پرویز ملک، وزیراعظم دے مشیر محمد علی، وزیراعظم دے معاون خصوصی طارق فاطمی، گورنر سٹیٹ بینک آف پاکستان جمیل احمد اتے متعلقہ اعلیٰ سرکاری افسران شرکت کیتی۔
